陳華鑫鬼屋探靈劏老鼠

summar8

無綫女藝人陳華鑫（Gloria）擁可愛童顏，但自爆原來勁大膽，笨豬跳、探靈、解剖老鼠都未驚過，新一年她直言想擺脫甜美框框挑戰陰暗角色，早前更在劇集《誇世代》中，挑戰巴西柔術！

近日入紙排期，與圈外男友註冊結婚的「少男殺手」陳華鑫，參選2012年港姐入行，擁有童顏外表加雞仔聲，多被安排飾演學生妹或Sweet爆性格角色，在《性在有情》中的校服Look更是殺死人，吸引大批網友喜愛！不過，Gloria直言新一年想挑戰並開拓成熟路線，故受訪時特意穿上黑色薄紗裙洗脫稚氣，俯望時更有幾分貌似國際影后章子怡。

恨演雙面人

Gloria直言她並非可愛怕事的女仔，大膽事迹甚多：「好似同一班朋友跳笨豬跳，個個朋友都驚到退後，我就率先跳落去！又試過去鬼屋探靈，大家都唔夠膽入，我就做第一個！讀書嗰陣生物科要劏老鼠，我都完全唔怕血腥，唔怕臭。」問到想試演甚麼角色？Gloria表示想演雙面人，表面善良但內心惡毒，而在拍攝中的新劇《12傳說》中就有突破：「我飾演電視台藝人，性格好黑暗仲會殺人，奸奸哋！大家會睇到我唔同嘅一面。」

操巴西柔術

而在最近播畢的台慶劇《誇世代》，Gloria亦有新挑戰，自嘲毫無運動細胞的她要接受巴西柔術訓練，直言做熱身運動比練武術更辛苦：「每堂要跑20個圈，做Sit up同掌上壓，踎低起身見頭暈，返到屋企成個人軟晒，手腳都瘀晒，手臂都係同江嘉敏練習時佢啲手指印！（感覺如何？）開心嗰排做多咗運動，身體都好咗，就算有少少辛苦但都開心。」Gloria又表示自小有畫畫得獎，希望將來有機會開畫展及畫廊。
文：影視組
攝：劉智源

summar8

summar8

summar8