香港人坐巴士 5大討厭行為
繁忙時段坐巴士，有邊個唔想坐？最近竟然有個西裝阿叔係巴士，以「呢個位有人！」為由，幫五個站後上車嘅女伴「霸位」，嘩，你估茶樓飲茶咩？究竟為咗有位坐，港人可以去到幾盡呢？而家好多人「被要求」奉旨讓座，好似小編試過被一個中年阿叔聲大夾惡問我：「點解你唔讓座比我？」我眼見佢中氣十足，成頭黑髮，絕非長者或殘障人士，於是我為咗啖氣繼續留在座位；身邊大肚婆朋友，腹大便便坐博愛座，卻被水貨阿姐要求讓出座位，結果朋友挺起肚立即起身，讓一眾目光歧視呢位水貨阿姐，來一個無聲抗議！香港人怪人怪事太多，以下五大坐車討厭鬼，你遇過未？定係你自己係其中一員？
1. 大聲講電話：唔知點解中年阿叔大媽最鐘意撞聾咁大聲講電話，論盡家事國事天下事，短短15分鐘車程，了解佢程度媲美身邊好友。講真，返工前後可唔可以比我靜下呀？對耳或個電話有事，就去Check下啦！
2. 腳放對面座椅：一招「飛象過河」雙腳放係對面座，除咗佔用兩個位之餘，亦無功德心，我點知踩過乜呀？好多人坐到好似自己屋企一樣，大爺式坐法，攪到隔離個位得返2/3個位，大佬，我地車資係一樣架！
3. 搶位：見到有空位，好似見錢一樣開眼。小編試過讓座比伯伯，點知大媽九秒九衝埋去，唯有大大聲話比佢同其他乘客知:「我係讓座架」，咪又係死死地氣起返身。所謂面係人地畀，架係自己丟。
4. 渴睡症：上車瞓覺無問題，但個油淋淋嘅頭好似吊鐘咁左搖右擺，重會將個頭擱係你肩上。你話你係索女就話啫！
5. 輪椅位放行李：而家水貨客咁多，一喼二喼霸曬輪椅位。小編係元朗見過有輪椅人士上車，車內水貨客都不動如山，你死你事。
http://i.ytimg.com/vi/M2k22HUMX0M/hqdefault.jpg
不知何謂討厭！
http://imgxiao.39yst.com/uploads/allimg/170426/16-1F426103U00-L.jpg
絕對令人極之討厭
自己坐1個，手袋行李坐1個，開口要求讓位都可以無動於衷，直情覺得自己合情合理，一於懶理。