森美「採陽補陰係真㗎！」
香港人均壽命越來越長，因此好多傳統養生保健嘅方法亦越來越受重視。夏天要消暑，踏入秋天就要滋潤，《蘋果》日前邀得森美分享養聲、養生到養心大法，佢仲透露女士保持年輕嘅秘密：「已婚女士多啲同老公親熱，可以提升荷爾蒙保持體態，唔係呃你㗎。」森美日前喺廣播道接受《蘋果》專訪，甫坐下提到早前有報道指「強國人飲熱水養生」，佢話：「我朝早鍾意飲大冰水，因為個人唔醒嘛，我知道係唔好嘅。其實飲凍嘢落個胃度，會令身體幫你加熱，正如你飲熱水，身體就會幫你降溫去調節。我問過中醫，原來凍、熱水都唔好，室溫就最啱啦，因為任何令你身體改變溫度去調節狀態都係唔好，所以其實室溫水先最好。」
連飲杯水都咁多學問，隨後叫森美接受「秒速測試」，喺5秒內解答簡單問題，從中講多啲養生同養心嘅見解。
叫佢示範3款笑聲，森美話：「好多時，我哋喺節目未講都會笑咗先，因為做節目好需要氣氛。就算嗰件事唔好笑，你聽到笑聲都好自然會笑咗先，真㗎。你知啦，好多人都係揸車嗰陣就聽收音機，揸車好悶架嘛，所以我哋都笑咗先，令大家開心咗先。」
至於秋天令佢諗起嘅嘢，森美諗都唔諗就話係蛇羮同羊腩煲：「唔知點解會諗起，但又覺得好暖笠笠。秋天會令人覺得寂寞，就會搵個女嚟攬下，我講緊自己個女呀，唔係其他女。」至於養聲三寶，森美竟然話其中一樣係辣椒：「有時開唔到聲，食辣椒真係會開到，可能行氣活血，好似你做運動咁，我成日都一路做gym一路唱歌，唱得高音啲㗎。」
提起運動，森美都曾經係肥仔，令佢保持狀態嘅方法，除咗做運動同節食，連荷爾蒙都好重要：「23歲之後，身體嘅荷爾蒙會下降，多啲運動會幫助到，而心態都係令荷爾蒙分泌好重要嘅一樣嘢。男人要覺得自己成日仲追緊女仔咁，女仔就要諗住自己仲係有人追咁。中國傳統成日話採陰補陽、採陽補陰係真㗎，所以結咗婚嘅人行房都好重要，行房次數正常，係會心境同身體都保持狀態，女性尤其需要。因為你唔再同老公親熱，個身體以為你唔需要生仔，腰就唔再瘦、皮膚又會變，我成日都同身邊啲女仔講，真㗎，就算唔係親熱，攬下錫下都好㗎。我哋做《公子會》（電台節目）嗰陣，成日都話老公聽得老婆講最多就係『喂呀！』同『咪啦！』（拒絕親熱），以後希望啲老婆講少啲，哈。」
https://static.appledaily.hk/images/e-paper/20181109/large/1541775492_e60c.jpg
https://static.appledaily.hk/images/e-paper/20171115/large/1510733144_fbca.jpg
https://static.appledaily.hk/images/e-paper/20180815/large/1534315735_9ae1.png
頁:
[1]