絕種男人 林嘉華
絕種男人 林嘉華1974年便入行做《少年警訊》主持，其後加入麗的電視，1980年過檔無綫，2012年約滿無綫後再轉投剛開台的HKTV（香港電視），一生能為三個電視台打仗的人不多，林嘉華則每次都站在最前線！天生革命運的他亦不禁笑說：「中六合彩又冇我份！」雖然曾效力多間電視台，但他在感情上絕對專一，花花世界裏零緋聞，他一直堅持原則：「就係諗咗當做咗，哈哈！」講就容易，但他真的做到！
文：鄺蔚霆
攝：Daima
服裝：Jumbo Lau
場地：港威酒店Three on Canton
香港的電視史上，曾出現幾次歷史性改革，70年代麗的、無綫、佳藝三分天下 ，無綫向當時身在麗的電視的嘉華挖角。90年代，亞視出現不少有質素的劇集及節目，令無綫收視下跌，當年無綫高層馮美基（May姐）臨時班救兵，找當時已移民加拿大的嘉華回港拍《金裝季節》救急。2014年，HKTV顛覆傳統睇電視模式！林嘉華主演的《警界線》作為開台劇之一，為港視打頭陣。「又咁得意，三場仗我都有幫手，三場仗都企喺唔同電視台，有人話我有革命運，我覺得冇關係，革命與生意競爭係兩回事，幫手打仗就真嘅，都係咁啱囉，中六合彩又冇我份！」
開創性跳槽
當年他過檔無綫而跟麗的反面，更指明「永不錄用」，他笑說：「呢個世界冇嘢不愉快，梗係永不錄用啦，依家都冇咗麗的電視啦，同埋當年由麗的跳槽過TVB係破壞性計劃，TVB要破壞麗的，等佢哋冇小生用先會挖我過去，同依家唔同！HKTV係開創性，希望可以開創多啲平台出嚟，界觀眾多啲選擇，同以前係兩回事，依家似一個新紀元開始多過似打仗。」
今年入行第40年的嘉華，希望HKTV的新模式會令觀眾接受，「我係一個有期望同理想嘅人，希望香港電視製作回復返以前百花齊放嘅年代。」可惜甚多圈中人都放棄香港市場，北望神州，「點解要放棄香港市場？唔係因為香港市場細，而係冇平台！觀眾就會流失，睇日韓、大陸劇，我哋喺香港土生土長，將40年時間擺喺香港製作，唔想睇到香港燈槽熄燈，所以我點都唔會放棄，我係最驚觀眾放棄，唔再睇香港製作，其實靚嘅製作，無論你喺東南西北都會睇。」
冇腳雀仔
26年前為了讓兒子林政峰有更好的成長環境而舉家移民加拿大，但嘉華亦不間斷回港工作，既然兒子已長大成人，而明言不會放棄香港，那為何不回港歸根？「冇所謂㗎，使咩嘢搬嚟搬去啫，邊度有嘢做就去嗰度囉。（飛來飛去好煩？）又唔係我揸飛機，我癲㗎，飛機未開我就已經瞓着，唔係我老婆叫我食飯，我張機票蝕㗎。」
訪問當日從事服裝指導的林太劉寶珍亦在場打點，他坦言工作時帶着太太在身是兩夫妻維持關係的秘訣之一！「我熱愛工作、全程投入，但我係有家室㗎，成日工作要周圍走，對我太太好唔公平，帶埋佢一齊可以多啲時間相處。佢會照顧我，幫到我好多，好似由頭到尾嘅形象都係佢搞。」剛過去的「雙11」光棍節正是二人結婚30周年，多年來能做到零緋聞，林嘉華聽到「緋聞」兩字疑惑又陌生，「緋聞？你都幾難摷到我有呀陰公，係咪好似坐飛機唔食飯咁蝕咗呢？」林太聽到這裏即忍不住笑了出來，嘉華再七情上面：「哎呀，蝕晒?呀陰公！（情侶檔登台搵錢都冇你份！）哎呀，你唔早出聲？等我搞吓緋聞搵錢呀嘛！」但嘉華隨即正經說：「但咁又唔得，呢樣嘢唔fair喎，唔好咁市儈啦！」
愛得快，抽離更快
難道嘉華的正氣，令狂蜂浪蝶不敢埋身？「因為演員係職業，其實你問我喺咁多年嚟演情侶，有冇愛過對手，係一定要愛㗎喎，你唔愛個對手，冇得演㗎，啱唔啱呀！我哋呢個行業係要喺最短時間同距離去建立感情，我如果唔能夠掌握呢個技巧，好蝕㗎喎，個導演會詐型，因為演情侶一開工就可能要Honey Honey，要咀嘴㗎喇，如果你唔愛對方，短時間入面撻唔着，係唔能夠完成自己工作。（抽離得快？）一定要抽離，要識得咩叫演戲，嗰條『警界線』要劃分得好開，要同自己講演戲㗎咋，我有個真愛喺度！記住太太係我最愛嘅人，自己就把持到！其實有好多嘢，『諗咗當做咗』就得㗎喇，戲裏面大家係情侶、老婆，就當做咗㗎喇，拍戲已經過咗個癮，拍完咗就到第二個，都不知幾好！」
講開感情事，嘉華還說很想有桃花，「入行之後拍拖都唔會好張揚，而且已經冇乜時間拍拖，仲要搞咁多個，咪盞自己麻煩，一個就一個，唔OK咪完咗一個先有第二個囉！」但他笑言每年睇運程書都期望有桃花，「呢行如果冇桃花就冇乜嘢撈，桃花除咗旺人緣之外，仲有假桃花，拍戲投入同抽離要掌握得好好，要同對手溝通清楚玩唔玩得，如果玩得唔使就住，可以將距離拉近啲，演情侶、夫婦就更易投入，同埋隨住年紀增長，遇到嘅對手都成熟咗，更加唔使浪費時間培養感情，一撻就即着。」
冇底線的演員
現年57歲的林嘉華絕對是「防腐劑」一族，演藝生涯要多做二、三十年絕非難事！「我對呢行咁醉心係呢行做嘅嘢，其他職業永遠都做唔到，呢個行業諗到想做嘅嘢係會做到，我《警界線》做嘅賊王型到呢！（有咩想做但未做？）其實我係一個冇底線嘅演員。」難道可以三點全露？「係冇低線，唔係冇底褲，我唔想演一個正常人，我參考咗好多演技，其實好多演員喺度做緊戲，只不過佢自然到你唔覺得佢做咗，好厲害！同埋雖然我做好多警察角色，都會要求自己唔好用返之前嘅演技，係好難，但咁先有進步！」這種老戲骨的好男人，世上無幾。weekend
METRO
頁:
[1]