幸福包圍我 黃翠如
幸福包圍我 黃翠如情人眼裏出西施，尤其是熱戀中的男女，看見黃翠如把蕭正楠讚得天上有地下無就知，翠如鍾意對方夠簡單開心，「我哋都係好易好開心、易笑嘅人，講一兩句無聊嘢就可以笑好耐！」當初由爆出戀情時不被看好，到現在成為金童玉女，翠如歸功男友，讚他在任何情況下，都會保護自己！雖然肉麻，但勝在夠坦白。
黃翠如、蕭正楠（Edwin）因拍《師奶Madam》戲假情真，劇集播出後，見到首次合作的二人已經默契十足，鬥氣連場，十足十港版《史密夫決戰史密妻》難怪會鬥出愛火花！不過翠如不認為是拍此劇撻着，「拍嗰陣都唔熟、冇感覺，我哋工作以外，冇傾偈，真正互相認識係拍完劇之後，我出埠時去拍《走過足球聖地》3個月嗰陣，大家開始短訊。」
飾演一對臥底夫妻，Edwin角色麻甩不羈，與翠如的優雅美麗相映成趣！可是現實生活中，二人卻轉換角色，「我麻甩過佢好多，佢個袋同架車永遠都好整齊好乾淨嘅，我個袋所有嘢係亂晒、架車好似貨車咁，亂得好緊要，佢架車成日抹，我架車幾個月都唔抹一次。」做夫妻大多一凹一凸，互補長短，大概已經想像到日後蕭正楠是負責家務吧，她即甜笑指二人才一起沒多久，「我從來都唔諗將來，係唔鍾意計劃嘅人，我覺得計劃總會有改變嘅時候，就有可能失望，所以我好鍾意我嘅人生好浪漫，煮到埋嚟就食，Edwin比我有條理好多，但佢都好順其自然，我哋兩個都係好開心嘅人。」
同蕭正楠比賽
雖說活在當下是一件好事，但女人生理狀態是有個期限，現年33歲的翠如指沒有刻意計劃生B，「啲女仔會自細幻想幾歲結婚幾歲生仔，但係我從來冇諗過，有冇BB都乜所謂，我最細嗰兩個細妹同我相差差不多十歲，我有份湊大佢哋，嗰啲換片、喊、餵奶、掃風我全部經歷過。」你唔生Edwin介意嗎？「呢個太快喇，大家都享受緊依家自由自在嘅生活！ 」負負得正，一對宅男宅女走在一起竟然會衝出屋企，「 依家拍拖就有個藉口畀我哋四周圍去，對於我哋嚟講去邊度都好新鮮，突然之間聽到麻醬撈麵好好食，咁我哋就排隊入去食，好自在。」
別看翠如現在能對男友侃侃而談，她自爆最初拍劇時十分驚Edwin，「唔係驚佢惡，而係我第一次做喜劇，唔識點拍、唔知道點嘅節奏先啱，佢經驗多我太多，如果佢好好笑，但自己成嚿飯咁，接唔到就會浪費咗，所以一開頭就跟住佢做，適應咗之後就開始比賽！」她笑言全套劇跟Edwin一起拍的場口都是個比賽，「我哋每一場戲都嗌交，但未Role機前試排嗰陣大家都會留力hea住講對白，唔想畀對方知道自己可以去到幾盡，拍完之後睇返個笑位係嚟自我定佢，或者嗌交邊個贏咗就『1:0』，不過最後埋單都係佢贏多啲。」翠如經常指跟男友相處就像兩個男仔一起玩耍，但撒嬌總是女人本性，難道就沒有一點浪漫元素？她指普遍女性都會撒嬌，「但我唔係好多女性嘅溫柔，佢都形容我似個男仔。」
在劇集中嗌足廿集，但現實中翠如和Edwin相處時從未有任何爭執分歧，「暫時我哋嘅睇法、價值觀好似，佢好遷就我，咁我都唔係好野蠻，我係一個冇乜主見嘅人，要決定任何嘢就佢話事，我就『哦』咁囉。」都幾小女人!「我對住任何人都係咁㗎，個個都可以幫我決定，我係個冇乜睇法同有選擇困難症嘅人，除非係一啲大是大非，或者價值觀，但平時生活上所有嘢我都唔識選擇。」兩人有好多不同之處，但更多相同地方，「我哋有好多嘢好似，連思想都好似，嗰一刻我諗緊嘅嘢，佢都諗緊，或者我哋send 短訊畀大家，會同步send緊一樣嘅嘢，幾得意，我依家已經好知佢諗緊咩，佢都好知我諗緊咩。」你們喜歡對方甚麼?「我諗都係簡單，好開心，我哋都係好易好開心、易笑嘅人，講一兩句無聊嘢就笑好耐，大家都冇乜planning嘅人。」
幸福並非必然，現在的甜蜜全是自己修成的正果，回想當初二人在了解階段時已「被公開」，負面報道不絕，鬧得滿城風雨，她坦言當時十分無奈，「當時好lost、好難過，當然唔想太快公開，喺沙灘嗰陣大家先了解緊，好似突然間變咗大家睇劇情發展咁。」關係尚未穩定就被廣泛談論，「見光死」的藝人情侶屢見不鮮，她表示能刻服困難全靠男友，「最主要係佢，佢好叻，每次我好擔憂嘅時候佢都會企喺前面去保護我，啱啱開始一段關係總會有摸索期，同好多唔肯定嘅事，我哋都話好多人都捱唔過，但係依家OK，因為我哋捱過咗囉。」如果過不到這一關，兩個正在上位的小生花旦就會就此玩完，「冇諗過星途問題呀，嗰一刻實在太多嘢亂到諗唔到，嗰段時間不停喊，不過依家掉轉嚟睇個Outcome，佢身邊每個人都對我好好，依家好開心、好多人支持、祝福，我覺得先苦後甜啦。」
少說話多做戲
從有線過檔TVB，一來便做女主角，演技由最初備受批評，到去年勇奪飛躍進步獎，「其實係由《愛我請留言》嗰時啲人接受咗好多，可能我個角色係好多女仔嘅經歷，變咗好多人投入落去，支持聲音亦開始多咗，但我覺得任何批評聲音都要接受，積極咁去進步。」
入了TVB只是短短兩年多，她自覺最大改變是比從前安靜，「我以前冇依家咁鍾意聆聽，入嚟嗰陣時已經聽人講唔好成日亂講嘢，我同洪永城兩個成日口不擇言，但係原來好多人會當真㗎，你覺得好好笑，其他人未必鍾意，或者覺得不被尊重，所以處理好自己本分就得，本分以外唔需要畀太多意見。」曾經試過因亂說話碰釘？「我係個中堅嘅和平平等分子，我見到有不公平，或者有人做咗啲嘢好歧視就會出聲，但有前輩同我講你眼睇到呢個人嘅表面，但唔知背後嘅原因，出咗聲可能會為難更加多人，好似又係喎！」
如果翠如要整容
在《師奶Madam》劇中因整容而由醜小鴨變天鵝的翠如，現實中有想改善的地方嗎？「我想整腳，想高啲，多3cm，着衫會靚好多，（點解3cm?）我依家得166cm，170cm又太高！同埋我想整手，我啲骨好幼，似饑荒難民好唔靚！」她還想將耳仔整成少少兜風耳，「兜風耳仔好得意、好靚！」翠如的審美眼光果然有自己一套。
好姊妹洪永城
跟洪永城的合拍程度，就算澄清沒拍過拖都沒有人相信，究竟二人欠缺甚麼而未能成為情侶，「爭咁啲感覺囉，我哋自細已經對大家冇感覺，但有好多嘢會互相同對方分享，佢係我好姊妹，我係佢好兄弟，我哋默契係用十年時間來培養，唔係同事，係好家人，同埋我哋對做旅遊嘅態度好似，綜藝方面都想繼續同佢一齊做，至於其他嘢就各自努力啦，驚對得耐又想打交。」注定是一輩子的最佳拍檔！
由事業到愛情，都在沒有計劃下發展，卻如此順利，她自言一直以來都是個好幸福的人，「我都會成日問自己，由細到大都咁幸運，會唔會有一日啲幸運被收走晒呢，因為我唔係入嚟TVB先咁幸運，我從來都唔使諗太多，身邊人又對我好好，工作有好嘅安排，所以我好感恩。」希望翠如的幸運延續落去，跟蕭正楠像畢彼特和安祖蓮娜祖莉一樣，能夠開花結果。
metro
頁:
[1]