請關注孩子們 劉德華
本帖最后由 frefer 于 2015-3-20 10:29 编辑劉德華（華仔）主演的新片《失孤》，講述內地拐帶兒童的問題，難得劉天王放下形象，甘願暴曬兩個月，又磨去指甲，扮演一身土氣的農民，從未如此的華仔，坦言連快將三歲的女兒劉向蕙，差點也認不出他。
以往演過無數電影和角色，也演過父親，但今次不同的是，華仔於三年前當了父親，這次演一個失去兒子的父親，他坦言情感上更投入：「當然做父親嘅感覺強咗。」拍《失》片為的是甚麼？華仔很認同導演彭三源的講法，就是希望引起大家的關注。
失與得
導演彭三源首次執導，一來便是這類沉重的題材，加上要男主角劉德華演一個歷盡滄桑的農民，華仔說：「我唔係因為劇本而接，最初我未睇劇本，我知道個題材係打拐，而且係真人真事，喺我細個時，拐子佬拐帶係好大件事，依家香港好少有發生，但係喺其他國家，仍然有呢啲事，每年有接近200萬個細路唔見咗，全球都有呢個問題。」
華仔透露最初他也不明白導演為何找他去演，他說：「導演嘅想法好單純，佢同我講，因為你拍會有好多人關注。」
拍戲多年的華仔，這次跟新導演合作，需要時間磨合嗎？他說：「冇得磨合啦，始終要拍就拍，反而新導演要好好保護。（點解呢？）尤其我哋呢啲藝人，只要畀啲眉頭眼額，或者面色佢睇，所有人唔會再尊重呢位導演，所以我哋要更小心處理。」
對於兒童被拐的社會問題，屢屢發生，是否希望藉《失》片，救得一個得一個呢？華仔坦言：「只要你同我睇多兩眼個小朋友，可能拐人嘅就唔敢做，其實有時幫人發多一張相，唔知有冇用，但多一個人發可能會有用。」華仔形容好像在戲中，最後井柏然飾演自少被拐的男孩能找得到，就是一個不起眼的人幫了他，華仔表示他們不是想達到甚麼目標，而是想建立希望，他還笑稱：「下一次可以係拍《得孤》呢！」
追多個
劉德華向來甚少談及家人，三年前女兒劉向蕙（Hanna）出生，他的身份不單止是人夫，更是人父，當了父親的華仔坦言演繹時，情感上更投入，他說：「係呀！當然做父親嘅感覺強咗，但我對家庭理念，一向都好重，戲內冇乜細路仔嘅戲，反而三姑（吳君如）嘅戲有細路仔，佢見到小朋友，突然間話想生番個。（咁你呢？）想，想㗎！哈哈哈！（祝你今年成功？）多謝。」
在《失》片中，還有吳君如和梁家輝客串，華仔坦言由他親自邀請的，華仔說：「係呀，因為我有份演，導演話如果香港演員演，件事會特別啲，更多人關注，本來搵家輝做和尚，點知佢又要留番頭髮做舞台劇，其實唔係佢做邊個角色嘅問題，導演想香港藝人都好關注呢件事，家輝同君如一埋位好似上晒身咁。」
華仔談到不止他主演的《失》片探討打拐的題材，早前導演陳可辛也拍了《親愛的》，華仔說笑話：「如果陳可辛早啲搵我，可能我會接呢，哈哈！」他還打趣說：「我哋畀佢上（上畫）先。」
父與子
華仔在《失》片的造型，可說是前所未有，演活滿臉滄桑的農民，造型上他是如何練成？他說：「我哋行到邊拍到邊，見環境許可，我就落車去拍，好似有場在火車站嘅戲，嗰個城管係假，我旁邊嗰個人先至係真，佢仲問我個細路幾多歲唔見，真係冇人認得我，我都冇諗過會咁成功。」
為了令造型更有說服力，華仔花了兩個月時間曬黑皮膚，他說：「我暴曬咗兩個月，點解唔曬燈？曬燈靚過頭太平均，曬太陽自然啲，好似手指要特登磨咗去，唔可以咁光滑咁靚，手指仲要睇落好粗糙咁，嘩！拍完部戲，返嚟搞咗幾耐。」問女兒Hanna認得嗎？他笑笑口說：「認唔到，真係認唔到。」
華仔演一個失兒15年的父親，遇上年幼曾被拐的井柏然，雖然兩人沒有父子關係，但華仔在戲中幫對方尋親。
現實中華仔當了父親，在戲內他也是父親的角色，與井柏然發展一段父與子的感情，首次跟井柏然合作，華仔說：「可能喺開始時唔太信任，但佢好努力，我哋用好多時間去混熟，每次埋完位，我就同佢傾偈，例如傾吓覺得長輩係點樣，覺得劉德華係點樣嘅人。」華仔更笑稱：「佢得25歲，真係可以做我個仔㗎，我哋好傾得埋，可能我哋有緣分，講真有啲人我係傾唔嚟。」
未死心
拍這部戲，華仔跟住劇組穿州過省，可有遇到被拐在街頭當乞丐的小朋友？他說：「呢個我哋以前都見過，但我哋冇辦法去理解，真係窮定係畀人拐咗。」好像華仔的角色，因失去兒子後，不敢回家，每次回去好像只帶來失望，「我個角色好怕面對太太同媽媽，因為佢媽媽唔見咗個孫，所以我個角色如果唔去搵，媽媽會過意不去。」至於那位真人版的爸爸，華仔見過他，「佢失去兒子已經好多年，能搵番嘅意念已經很低沉，好淡，淡到你唔相信，佢依家幫人搵，但我唔希望係咁，信念好緊要。」
戲內有不少橋樑的場景，原來都觸動到華仔，「每經過一條橋，好似去到另一個地方，依家有機會，如果唔試唔去，就更加搵唔到。」談到與和尚的一場戲，華仔坦言最深刻，他說：「現場所有都係真和尚，只有同我對手嗰個唔係，唔知點解會咁似，嗰場戲拍得好好，因為好真，可能佢哋係真和尚，喺現場個種冷靜，你估唔到，當叫佢哋去休息，個個去搵個位坐低去做功課同唸經，呢一刻反而係導演想要嘅，於是冇打燈情況之下照樣拍，大概20分鐘就做晒，呢個真係好難得，我覺得好Magic。」
頁:
[1]