「世界警察」顯神通
(綜合報道)(星島日報報道)美國打貪，國際足協（FIFA）七高層被捕，震動世界球壇以至全球運動界，若嚟真，被捕者應陸續有來，豈止已公布的七名高層？兩項四年一度國際盛事——世界盃及奧林匹克運動會，乃兩盤天文數字大生意，任何國家成為主辦國，皆可在國際形象甚至實質利益上得到巨大回報，所以，屆屆都爭崩頭，所有欲做主辦國的，無不花上驚人數字「識做費」及製作比電影預算更大之宣傳片，以求一舉摘下目標。此乃一個早早早早「公開的秘密」，懵的才會不知。
為何幕後大鱷如此斗膽？皆因兩大國際機構不屬任何國家管，正所謂「公海機構」，有事發生，冇人有權、有義務去拉人封艇，將貪腐分子繩之於法呢！因此，局內人自然膽大包天矣。
一方面膽大包天，另一方面申請做世界盃及奧運國者有求於人，當然需要參照「地下遊戲規則」磅水，涉及的天文數字金錢，如何處理？本來，若收賄者有戒心，必會偷偷摸摸做好計畫四散躲藏。但是，有趣在一班大鱷由頭開始已自覺此乃一個冇王管的私人俱樂部。於是，收錢明目張膽，藏錢更毫不避忌。兼且，錢財如此容易由天降，怎不揮金如土、生活窮奢極侈？
此時，「世界警察」出招矣。打呢類國際大老虎，當然不能靠中國、俄國等出手。歐洲各國以至日本，根本冇力亦冇江湖地位去做。美國為顯「我仍是一哥」，怎不加多二錢重力去出招。
整個部署，有板有眼，FBI先低調四年前拉咗美國足協前副會長布萊澤，告佢「逃稅」（呢條罪要用，不少美國富豪必中招！），然後「要脅」佢做綫人，結果，一條綫就勾出多人在美國洗黑錢，利用美國的銀行收賄款。罪行在美國內犯，「細佬國」瑞士就有藉口幫手拉罪犯，一場可能摧毁國際足協及奧委會風暴立即捲起！
頁:
[1]