哈薩克莎賓娜索爆長城

hara3

17歲美女哈薩克球員莎賓娜-Altynbekova Sabina


【on.cc東網專訊】 美麗力量拯救地球！究竟邊個咁大言不慚，話自己可以靚到救到地球先？原來係靚絕體壇嘅哈薩克排球索女莎賓娜BB。有哈薩克傳媒爆料，呢位長腿美女正計劃趁住2017年哈薩克舉行世界博覽會期間，同時主辦選美會配合，佢自己當然係做活動代言人。據聞莎賓娜嘅建議已經獲得當地政府女性事務部門支持，屆時選美會舉行，佢人氣勢必爆升，更可推動世博聲勢一舉兩得，果真美貌與智慧並重呀！
莎賓娜BB日前去到中國北京出席活動，呢位哈薩克女排成員尋日就先係去到駐北京嘅哈薩克領事館交流，然後再暢遊長城，仲嚟個美麗留影，咪話筆者「小學雞」，真係要整番句超老土紀念冊對白：「萬里長城長又長，莎娜長腿比它長」！
年僅17歲嘅莎賓娜自從今年7月參加女排亞青賽忽然爆紅後，即時成為體壇女神，雖然佢先後推咗唔少商業品牌嘅代言聘約，但當有關世博會喺2017殺到哈薩克首都阿斯塔納，佢就有夢想要推行：「我一直深信用美麗力量係可以改變世界，我有個想法，就係以『美麗力量拯救地球』做口號，喺2017年世博期間，舉行世博小姐選舉，呢個會係震撼全球嘅活動。」
莎賓娜預計屆時會有來自全球過百名佳麗到臨哈薩克參賽，但就話喺主辦世博小姐之前，先會搞個阿斯塔納小姐選舉畀當地美女參與，並已經獲得哈薩克國家女性事務委員會支持。呢位長腿索女話到時會由100人選出25人，最後再決選冠軍去代表哈薩克出戰世博小姐。估唔到佢年紀輕輕都有咁多創意諗法，難怪做到新一代體壇女神啦！莎賓娜BB，愛死你喇！

hara3