把握「肌」會 張繼聰 韓馬利

heihei2

把握「肌」會 張繼聰 韓馬利       
喜劇，少不免注入誇張元素，使觀眾間引起話題，才能成功！就像最近熱播的劇集《老表，你好hea!》中，59歲的韓馬利（Mary姐）與35歲的張繼聰大玩忘年戀的重口味情節，令這對年齡相差24載的「熒幕情侶」瞬間人氣急升。除此之外，劇中阿聰不時剝衫騷肌，「色誘」Mary姐，當中一幕震波猜枚，被網民洗版式瘋傳，阿聰為苦練一身鋼條身形，背後辛酸Mary姐看得一清二楚，幸而這個「肌」會讓觀眾甚為受落哩！
豁出去
開拍《老表，你好hea!》前，張繼聰與Mary姐已得悉要演情侶，更有親熱戲分，對於這段「姊弟戀」，Mary卻自嘲為「母子戀」， 笑指自己的年紀能當對方的母親，而張繼聰則指向來被傳媒冠以「軟飯王」的稱號，自己也不介意豁出去，於是這對非一般的熒幕情侶就此誕生。
張：我都係得十幾歲啫（講笑），劇裏面我係一個軟飯王，而Mary姐就係一個闊太，不過我哋嘅組合得意在唔係去到真感情咁重口味。監製同王祖藍初初問我介唔介意做軟飯王？因為啲雜誌都寫咗我同老婆（謝安琪）好多年，反正好多人都一廂情願相信咗，咁我咪做一次滿足晒大家，反正成日睇雜誌都唔夠喉。當我投入咗角色，就唔會去理真實生活有咩包袱，加上有Mary姐咁好嘅對手，做吓做吓就好放。

韓：我都係第一次做呢類型嘅角色，之前監製同編劇都同我打咗個底，話畀我聽條線點樣去，我已經有心理準備，但睇完劇本覺得好小兒科啫，唔係我想像中咁勁，可以再勁啲。坦白講電視嘅尺度好有限，所以我諗點樣可以做到啲味道出嚟，又唔好過火，但如果勒住唔放，人哋又冇嗰個感覺，所以對手互相配合好緊要， 阿聰又畀我一種好舒服嘅感覺，大家好自然就釋放去做，刻意去做反而唔好睇。
日日狂操
初接劇本，阿聰甫知道飾演健身教練，為了一身弗爆身形，每日狂操健身3小時，拍攝期間，不難發現他就算在凌晨12點發微博，都說自己在跑步中，此外還要戒鹽、戒油， 餐餐烚肉、烚蛋配烚菜，就連Mary姐都大呼陰公，不過亦笑指對方唔騷才蝕底哩！

韓：練得咁靚，點可以唔畀人睇？日日見佢拍劇都係帶盒白灼雞肉，嘩！點食呀？佢真係好大付出！

張：食咗差唔多5個月，拍外景佢哋嫌棄成日食燒味飯，我叫佢哋睇吓我食咩先啦！食個蘋果、烚蛋、烚菜，佢哋都唔敢問我今晚食咩，因為我嚟嚟去去都係食嗰啲。其實全劇每一個人為咗個角色都辛苦嘅，你估郭晉安大熱天時戴個假髮唔辛苦咩？

七年不癢
自稱拍劇初哥的張繼聰，坦言拍劇很容易對對手（角色）動情，要抽離確實不易，他指：「抽身唔止係角色，而係生活模式，當你有3個月投入套劇裏面，角色同角色之間一定會產生感情，不過結咗婚會穩定啲。」今年踏入結婚7周年，阿聰指與太太見面時間不多，碰面只會處理家庭鎖碎事，要找浪漫談何容易？但他坦言很感激對方。

都：套劇播出之後反應咁好，乜嘢都抵番晒啦！近年發展咁好，有冇少少吐氣揚眉嘅感覺？

張：應該都冇乜烏氣，唔使吐！

韓：其實每個演員都係等一個機會，好似佢（張繼聰）咁， 其實我好欣賞㗎！之前有睇阿聰嘅舞台劇同演出，無論做主持、跳舞、唱歌、演戲，甚至係打都得，係一個有實力嘅演員！一個人有準備，一有機會就可以發揮。

張： 下午茶食咩？哈哈，我覺得唔係，只係廿幾歲嗰陣有啲困擾過嘅，嗰陣好唔開心，好想證明自己，但之後經歷咗一啲嘢，就放開咗。嗰時長年累月咁畀人寫，中間經歷好多思想上嘅嘢，到我搵到存在價值時候，已經覺得唔需要再證明自己。依家吐唔吐氣揚眉已經唔重要，最重要係每日過得開心。
拒與另一半合作
無獨有偶，張繼聰與Mary姐的另一半都是行內人。眾所周知張繼聰於07年與謝安琪（Kay）奉子成婚，至於Mary姐則在89年下嫁曾是配音員、人稱杜Sir的杜燕歌。近年杜Sir跳到幕前拍劇，而Kay亦於明年首嘗拍劇滋味，但談到夫妻合作，二人均耍手擰頭，斷然拒絕。

韓：我好介意㗎！唔會鍾意同老公一齊做戲，覺得會影響兩個人嘅感情，如果我同阿聰演，大家可以夾、可以傾。換轉係我老公的話，可能佢就會用老公身份講：「使乜你講？使乜你教我？」感覺唔同。
張：唔覺得有人想睇我哋兩公婆合作，做返夫妻又唔鍾意，唔做又好冇無說服力。唔似王祖藍同李亞男，我哋結咗婚，又有小朋友，返工已經好多時間，唔通收工仲要一齊講聽日場戲點演？同埋我唔可以畀佢知道我幾時返工㗎嘛⋯⋯哈哈！而且兩夫妻一齊做嘢好麻煩，好多濕星嘢會影響工作，我冇興趣合作囉！

都：喺《老表，你好hea!》中，Kay唔單止有份客串，仲同阿聰同場演出，第一次一齊拍劇有咩感覺？埋位之前Kay有冇叫你過兩招畀佢呢？

張：嗰場台詞係我自己度，佢就唔使度啦，都係做返自己，兩公婆同場好笑嘅地方係睇我點樣睇佢，所以我咪扮係網友，講晒網上啲嘢出嚟，其實一齊拍嘢嘅感覺都幾好，以前好少一齊工作，都幾好玩，但呢個係好例外。Kay都有拍戲經驗，有自己嘅演繹方法，做戲冇分錯同對，King Sir講得好啱，就算我係你老師、校長，大家一齊做戲，都唔會教你，因為做戲嗰陣大家都係演員，唔係上緊戲劇班，最多睇吓點樣做會夾啲。

同場加映
張繼聰現身撐Kay

張繼聰話就話拒絕與老婆合作，但早前本報巧遇二人合作拍短片，Kay住校服、孭埋背囊，青春可人，更與在場的學生妹打成一片！而阿聰亦父愛氾濫，抱住一個小妹妹合照，不過這段短片是為Kay早前的演唱會而拍，屬於半玩票性質，如果真係想正正經經睇二人合演，睇怕粉絲們等到頸長都未必等到！撰文：鄺蔚霆｜攝影：Daima

[size=14.3999996185303px]張：張繼聰 韓：韓馬利 記：記者

[size=14.3999996185303px]METRO