及時行樂 莫文蔚

yatya

有些事，錯過了就再也回不來，現在不做，以後都不會做。是來不及的感覺嗎？44歲的莫文蔚（Karen）有着深切的體會，「我討厭來不及而成的遺憾！」去年初，父親突然心臟病發猝逝，未能趕及與父親見最後一面，是人生一個遺憾。父親的離世令Karen有所啟發，「如果有能力，就勇敢地放開一切，做自己想做的事。」所以Karen與老公Johannes去完3個月旅行之後，正式投入工作不久，又開始心癢癢想放假，真正做到 “Work Hard , Play Hard”


如果沒有離開，又怎會有重逢的機會？說得瀟灑的莫文蔚自喻為「冇腳嘅雀仔」，由讀書到工作，Karen多年來都不停在世界各地游走，經歷無數的離別、出發、再見，她如此形容自己：「我永遠都好似係On the road，如果我停耐啲喺同一個地方，就會感覺怪怪哋，但呢個就係我嘅人生，不停說再見，又不停Say Hello！」
去年，Karen籌備國語專輯《不散，不見Departures》時，同時也正籌備與德國籍老公Johannes，展開3個月的環遊世界之旅，想到暫別，發現這趟旅程竟然跟專輯的概念不謀而合，想以Departures作為概念，Karen指主題歌《不散，不見》是整張專輯的神緒，她說：「做呢張碟嘅時候，遇上我爸爸突然離開，啱啱開始搵歌，呢首歌嘅作詞人李焯雄同我合作好耐，太了解我，佢好明白我當時嘅心情，將某部分感覺放咗落歌詞。」
來不及說再見
不喜於人前表露自己的情感，就在歌曲中發洩出來， Karen謂：「今次隻碟係好個人嘅，係記錄咗我嘅心路歷程，每首歌都觸動到我唔同嘅情緒，今次完全就係莫文蔚。」


Karen爸爸莫天賜，去年初突然心臟病發猝逝，當時Karen身在英國，未能陪爸爸走完人生最後一程，她感慨地說：「佢離開得好突然，完全冇預備去面對呢件事，我冇見佢最後一面，冇同佢講最後一句說話，仲有啲咩我冇同佢講過呢？以後都冇機會再講，會覺得嚟唔切去做一件事係幾咁遺憾。」Karen坦言討厭來不及的感覺，「唔一定係面對死亡，可能係好多情況都會發生，我好唔鍾意嚟唔切呢種感覺，嚟唔切係會變成遺憾。」
Karen自小就養成獨立堅強的性格，面對人生的悲歡離合，有着獨特的見解， 對她而言「分離」不一定代表哀傷，「面對生離死別，可能你需要放低一啲嘢，然後令你有機會，去尋找到另一樣嘢。」 爸爸的離世，反而啟發了Karen，從而了解到，有些事想做就盡情去做，「我覺得如果有能力可以的話，將所有嘢放埋一邊，做自己好想做嘅事，原來呢一個都係一種福氣。」
不再沉迷工作
未結婚前的Karen，是工作狂一名，她說：「以前係唔使考慮，工作排第一，所有嘢都要行開，將工作表填到滿晒，咁我就覺得好滿足同充實。」
結婚後產生了微妙的變化，成為人妻的Karen不再沉迷工作，懂得安排時間與老公二人世界，跟家人及朋友相處，將生活看得更透徹，她說：「生活係有唔同嘅人同事，係要搵一個平衡，唔係淨係癲咗咁將個心機放喺某一樣嘢度，想將自己生活分配得好啲，唔想淨係工作。結咗婚，好自然有啲事就會問吓老公意見，唔會好自私想點就點，我覺得係應該要有呢個變化，如果唔係結咗婚就冇乜意義。」
一提起初戀情人老公Johannes，外表硬朗的Karen頓時變成小綿羊，不時掛上甜絲絲的笑容，講起與老公環遊世界的3個月，問到感覺如何？ Karen以一個字形容：「正！」她透露工作22年，從未過放一個悠長假期，今次放假發現人就算有幾熱愛工作，都需要放假，去看看周邊的世界。
有愛人相伴，旅程有不少得着吧！Karen直言與老公單獨相處了3個月，感情有增冇減，「最難得就係可以同我老公見足3個月，24小時對住，真係好開心，冇嗌過交，相處得好好，平時我哋分隔兩地，佢喺英國返工，我喺香港工作，所以呢3個月都係想畀番個首選對方，成個旅程好有讀書拍拖嘅感覺，以前會孭住個背囊，搭火車四圍去玩，非常有探險Feel。」
一個愉快的旅程，令Karen頓悟人生不只工作，享樂也很重要，就是活得精采、及時行樂也。


Karen去旅行時大解放，裸露上身跳入大海