前線警WhatsApp控訴高層

kazi

【旺角騷亂】
【本報訊】釀成130名警民受傷的年初二凌晨旺角騷亂事件餘波未了，連日不少警員批評當日警隊調動失當，狠批盧偉聰軟弱，有警員在WhatsApp群組羅列至少20項不滿，指摘高層調動不當致警員未能配備適當防護裝備，亦未有因應現場失控情況將事故升級及使用催淚彈，矛頭直指警隊一哥盧偉聰及當晚負責現場指揮的西九龍總區指揮官余達松，怨氣不少。
記者：黃學潤

對造成90名同袍受傷，警隊中人十分氣憤，不少人認為同袍當晚是以血肉之軀抵擋示威者的磚頭，令前線警員變成「人肉盾」。過去幾日，有警員在WhatsApp群組反映不滿及希望警察員佐級協會向警隊反映，部份短訊火氣十足：「咁多同事受傷，亦有些重傷，管理層作何感想？」「旺角當晚，係邊個做指揮？」「AR-15、布袋彈、橡膠彈、催淚煙，點解全部唔用？」
緊急調動致無防暴裝備
警員反駁對於他們裝備不足的說法，澄清自己是未能配備最適合裝備上前線。有警員指，衝突最初期是旺角警區警員及西九龍總區的衝鋒隊在場控制場面，但其後衝突升級加上有警員開槍，即時由西九龍總區接掌現場指揮工作，並臨時調動剛在尖沙嘴完成花車巡遊人群控制的機動部隊Y連及另兩隊機動部隊警員到場，由於事出突然他們未能回總部配戴本身的防暴裝備，包括俗稱「韓國裝」的全綠色防護防暴戰衣。其後亦沒有安排防暴裝備增援。
翻看騷亂當晚的片段，在場警員只配戴頭盔、短盾牌、警棍及胡椒噴霧等基本裝備，有警員指當時事件已演變至警員鳴槍阻止示威者及有人縱火，認為情況已經失控，負責現場指揮工作的高層理應將事件升級至騷亂事件，這樣警隊可以抽調更多警力到場，可望更有效控制場面。
消息稱，負責當晚現場指揮工作的是西九龍總區指揮官余達松、西九龍交通部高級警司陳國基及旺角警區副指揮官丘紹箕，有警員質疑當晚在場的高層未有同意使用催淚彈或催淚煙，亦未有果斷採取驅散行動，致無法驅散人群控制場面。
疑怕批評不准用催淚煙
不過有消息指前年傘運，警方因在金鐘施放催淚彈大受批評，警隊對此顯得保守。據知，現時行動中是否需要施放催淚彈或催淚煙，需經由警察總部以警隊一哥為首的指揮中心拍板決定。
其實當晚警方知悉場面失控已即時抽調可動用警力全力增援，並啟動緊急應變機制，急召休假警員。當中由飛虎隊、反恐特勤隊、機場特警及槍械訓練教官組成的速龍小隊，據知他們是於當日凌晨2時接獲召集通知，即時返回粉嶺總部取裝備再到旺角執勤已是清晨，但因召集時間太趕急，當時出勤的只是機動部隊訓練隊。而且他們的裝備只有頭盔、警棍及圓盾，雖然小隊曾於前年佔領行動時，以迅猛快速手法擊退激進示威者進攻，但這次出動，他們初期一度能驅散示威人士，但面對示威者投擲磚頭便節節敗退，十分狼狽。最後速龍小隊需向在場機動部隊警員借來長盾才能穩住陣腳，重新部署出動。

kazi

前線警員對管理層20項不滿及質問
1.喺旺角當晚係邊個做指揮？

2.佢有冇接受過PTU訓練？

3.點解唔使用相應嘅武力？

4.喺暴動嘅情況下點解唔使用IS Tactics（防暴戰術）？

5.點解要前線同事用血肉之軀抵擋磚頭？

6.究竟當時決定打定唔打？打就應使用相應武力，唔打就應該立即撤退。

7.磚頭係致命武器，點解唔可以用槍去保護生命？

8.新聞報道講：「警員俾暴徒追打！」，管理層作何感想？

9.有咁多同事受傷，亦有啲受重傷，管理層作何感想？

10.防暴裝備同IS Tactics（防暴戰術）如果唔係用嚟對付暴徒，咁係咪只用嚟擺房和用嚟表演用？

11.高層唔好再講強力譴責呢啲廢話，更加唔好講前線同事好克制，只會令同事越聽越㷫！

12.點解俾暴徒猛掟磚頭，嗰啲高層依然叫同事企響度做人肉盾？究竟係乜嘢戰術？如果要企，懇請所有高層同前線同事一齊企，俾暴徒用磚掟，睇下邊個唔好彩畀掟死！

13.掟磚頭係致命武器，高層是否同意？再有類似事件，前線必定會take covers（找掩護）同埋使用槍械去還擊，唔會再做人肉磚靶，因為已經受到生命威脅，高層是否同意？但如果仲有啲無理、無常識高層要前線再做磚靶，咁點？前線是否唔需要理會？定還是由得前線犧牲送死，因為前線生命係賤命，高層升職仲緊要過前線生命？

14.AR-15（半自動步槍）、布袋彈、橡膠彈、催淚煙、手榴催淚彈點解全部唔用？管理層只驚傳媒，市民點睇，就唔驚前線同事點睇！難道咁激烈嘅暴行都唔應該用上述武器？如果適用但冇畀指示叫前線用，很明顯不配做呢個階級，所有高層是否要責任承擔及徹查事件？會有乜罰則？

15.前線同事冒生命危險去對抗暴徒，維護法紀，但CP（警務處長）喺記招居然回應會徹查前線有否不恰當使用其他武器，知否已經傷透所有前線同事嘅心同士氣，很悲哀！警隊果然係一將功成萬骨枯！

16.如果所有武器同戰術都係唔用，只係擺房，可否罷免再去training（訓練），因為係嘥時間同多餘，警隊自從佔中燒催淚煙後已經有啲龜縮唔敢再用催淚煙！更遑論橡膠彈、布袋彈、AR15等等！

17.今次事件係管理層作出錯誤決定，導致好多前線同事受傷，是否同意？點同前線交代？經常講責任承擔，管理層有否勇氣承擔責任？點承擔？

18.今次暴徒暴行，前線同事應該可以開100槍以上，同埋應該係遠距離作戰，點解仲要推前線同事去送死，用人肉擋磚？而家前線同事已經冇士氣呢個係因果，亦好難修復，管理層點回應？

19.請唔好打算用讚賞去畀受傷同事去覆蓋同事嘅不滿，前線同事係有尊嚴，不要當我們係儍仔！

20.前線同事呢幾日嘅憤怒情緒係冇停過！

資料來源：前線警員WhatsApp群組  
Apple

kazi

旺角騷亂中，有督察遭人毆打受傷，需由同袍救走。