鍾嘉欣五年後做媽媽

petpet

Weekend 鍾嘉欣五年後做媽媽       

甫入行事業便一帆風順的鍾嘉欣，坦言能夠為婚姻放棄如日方中的事業，已定下35歲前結婚的她表示，婚後立即實行「造人大計」，一刻都不能再等！現年30歲的她，等同向緋聞男友伍允龍派定心丸，看來BB被私有化的日子不遠矣！

文：鄺蔚霆 攝：Daima

鍾嘉欣04年由溫哥華回港參選《國際華裔小姐》奪冠，同年加入劇集《皆大歡喜》演出「洪白嵐」一角即入圍「飛躍進步女藝員」獎，兩年後即在《人生馬戲團》擔正做女主角至今，事業可謂平步青雲！但人生怎會沒有挫折？她笑說：「有都唔講得啦，唔係感情上，工作上啫，一定會有嘅，間中會遇到啲，咁先會令你成長，學識同人相處。」翻查資料，正值事業如日方中的嘉欣，08年因與伍允龍拍MV《二人世界》而傳緋聞，有傳此事觸怒了高層，09年遭公司雪藏，當年嘉欣亦只有《老友狗狗》這套劇出街，相比之前一年有5套劇孭飛，工作量的確減少。不過幸好嘉欣夠樂觀，「明白呢啲係訓練自己嘅考試，遇到任何困難、唔開心嘅事，會令自己明白到咩先係真正開心，咩人真正錫我。」她還感恩指入行多年來都甚多貴人幫忙，「每一年遇到困難都會有啲人幫我去解決，好似《大藥坊》套劇咁，好多人幫、好多人錫，I Guess！」

差點Unfriend 陳展鵬
在《大藥坊》中演繹女醫師「杜佳期」的嘉欣，笑言角色十分有桃花運，「識佢嘅男人都會鍾意佢。」那你現實中有桃花運嗎？「我都幾幸運，桃花都OK，唔一定要係男仔追，我會比較吸納到一啲人緣，未必係識得好耐、好Friend，但我身邊會有啲人幫我，唔一定係高層，普通人、演員或者前輩，佢哋會提點我、錫我、扶持我，大家好和諧唔會有不和。」除了去年例牌傳出爭視后，與楊怡及周麗淇傳出不和外，嘉欣都沒有不和新聞。她想了想，笑指差點跟陳展鵬有不和，「因為佢個角色要做個買賣佬，好蠱惑，講嘅嘢唔似真又唔似假，佢太投入角色，現實生活中都唔知邊句真邊句假，拍嗰陣會誤會佢，猶豫佢係邊個，不過冇嘢，佢拍完套戲就變返陳展鵬。」問到她和展鵬因被拍得同車及拖手而傳緋聞，她說：「上次都傳得幾激烈，我諗唔會再傳。」

擺20圍就夠
說回真感情吧！嘉欣和緋聞男友伍允龍感情愈趨浮面，大家不避嫌談論及支持對方，今年兩人生日，雙方儼如男女主人家出席生日派對，似乎只欠一句正式的確認，嘉欣亦直認感情維繫得幾好。「媽咪、爹哋今年開始催婚，不過佢哋催之嘛，我夠催佢哋快啲做運動啦，結婚呢啲冇得催，真係要自己有個Perfect Timing先得，我一定喺35歲之前！」
現年嘉欣30歲，還有5年時間，伍生不會等得太耐！那籌備得來都差唔多？「睇下你要啲咩婚禮，如果去啲Destination Wedding（度假婚禮），人哋已經搞掂晒畀你。」她又指結婚一定不會鋪張，喜歡一切從簡，「唔會擺一、二百圍，20圍已經好好，請晒真係最Close、最錫自己嘅人。」當問到是否與「男友」有共識時，她即害羞說：「都未講到結婚，我唔知呀，應該會（擺酒）啩，我哋好低調，唔講得呢啲，呢啲係神秘嘢嚟，可能已經有共識、或者點都唔講得。」話雖如此，但婚姻對女孩子來說，總有憧憬，嘉欣亦不例外，她笑言屆時結婚都要跟潮流發相，「依家個個都發相，我見到古巨基、陳豪都幾好呀，結咗婚之後先公開囉。」那有想過生B嗎？她想都沒想即答：「梗係有啦，即時生?啦，一結就生！一結婚就要Honeymoon， 冇得等，唔係年紀就大㗎喇，一陣間生唔到?。」看來嘉欣真的很想有自己的小朋友！她笑言原本想生4個，「依家諗住生兩個，因為我家姊啱啱生完，佢生咗10幾個鐘，好痛！（開刀囉！）梗係唔開啦，一定要順產，開刀先唔好，人生好似開3次刀就會唔掂，如果生B開咗兩次，咁有病嗰陣就唔知點再開，醫院就梗係想開刀啦，貴啲嘛，留院又留耐啲！」嘉欣突然暢談生仔經，真令人喜出望外！

為生B走樣冇所謂
既然講得高興，再下一城問多句。為了生BB，嘉欣可以去到幾盡？她說：「為咗個BB，鬆晒（身材）都冇所謂啦，都唔擔心走樣走身材、冇工作，有一樣嘢就一定要犧牲另一樣，冇兩全其美，個B以後就係你嘅一切，生得就要為佢好。」她指希望生一男一女，「湊到『好』字就梗係好，湊唔到都冇辦法，要睇吓自己有冇呢個福氣。（生B之後唔做嘢？）希望湊一年，等佢大咗先，喺外國都有一年產假，因為BB嗰個歲數係最緊要。」不過她表示自己性格不能不工作，「我生完後都唔想完全唔做嘢，我諗我唔係嗰啲少奶奶，我見到啲Friend淨係湊B真係會黐咗線，佢哋冇晒生活，淨係BB、屋企、BB、屋企，我雖然唔係要專心喺事業上，但都要有自己工作、少少獨立。」
可以為婚姻放棄名成利就，並非人人都能夠做得到，尤其是嘉欣已貴為無綫不可或缺的花旦，剛剛在台慶亮燈儀式又擔大旗率領其他花旦跳舞，每年亦有重點劇孭飛，今年有《飛虎II》和《大藥坊》兩劇在手，視后呼聲甚高！她笑言對寶座有信心：「信心年年都有！兩套劇的角色、性格都好唔同，《大藥坊》嘅杜佳期好有愛，會似我多啲，《飛虎II》嘅鍾韋恩就唔似我，不過角色愈唔似自己，愈揣摩得到，當有一個重新未做過嘅角色，想像空間會大好多，可重新創造一個性格畀鍾韋恩，所有動態、眼神、講嘢速度、衣着、陰沉都係我Create！」

嘉欣有兩面
說着說着，嘉欣忽然諗起去年上李思捷節目《玩嘢王》，「上次我就收到觀眾『嘩！乜鍾嘉欣咁嘅！』嘅反應， 佢哋會問我點解會咁快喊到出嚟，咁平時好單純嘅一面係咪都係扮出嚟？其實兩個都係我嚟，平時唔需要扮，當工作需要時先會做，我平時生活會做返自己。」
「我係一個好容易開心嘅人，你畀粒朱古力我，已經開心死，或者無啦啦錫一錫我，又會開心番。」容易滿足又容易喊；鍾意人錫又愛吃朱古力，嘉欣果真很BB！

都市日報