筍盤馬明 靚裝有匙

river

筍盤馬明 靚裝有匙        

英文有句話“Don’t judge a book by its cover”，提醒人不要因為外表而對事物預先下判斷，誰料到當初演閒角的馬國明，會變成今日的男神筍盤？不過這位「男神」對愛情慢熱近乎龜速，但不要緊，年屆四十的他原來早已想Settle Down，等待真命天女來封盤！未上車的女士們收到未？「靚裝有匙」，絕對係筍盤！



99年讀無綫訓練班入行的馬國明，在無綫演了3年閒角，終於被伯樂兼前戲劇製作總監梁家樹賞識拍攝《衝上雲霄》，與黃宗澤、陳鍵鋒、吳卓羲組成S4，其後再跟林峯及黎諾懿組成「奧運六子」，馬明8年後終於擔正做《律政新人王II》做男主角，會嫌上位不夠快嗎？「大家節奏唔同啫，你畀我上太快可能我都驚，反而依家安全感會大啲、踏實啲，觀眾慢慢接受你，感覺會好啲，好多時一個新人第一套就出嚟做男主角，可能畀觀眾鬧，女仔做新人，可以Sell靚，冇人要求你有演技，但男仔就唔同，講靚就成個小白臉咁，梗係講實力 。」
唔敢追靚女
入行15年，馬明表示這些年來最大的改變是性格開朗了不少，「真係改變咗好多又唔係，當然好過以前啦，初初出嚟嗰陣時我係啞嘅，好木獨，成日都畀羅家良鬧，佢話我好似佢以前，我頭3年都做路人甲乙丙，成日都坐喺個角落頭等埋位，唔出聲，又冇乜熟嘅朋友！後來有班波友，踢踢吓波就開始熟咗，我熟咗就多嘢講㗎喇，後尾拍《衝上》開始多戲，又同導演、梳頭化妝熟咗，佢哋話番我聽，以為我頭3年係啞㗎，哈哈！」
如此這般慢熱，難怪自從11年跟胡定欣分手後，Dry足4年都未找到女友，「我從來唔會一見鍾情，好少突然間話識到個女仔好靚、好鍾意就追佢。」跟無數靚女合作過的馬明，自爆不敢追靚女，「我唔敢㗎，以前讀書都係，見到啲靚女好鍾意但都從來唔敢追，其實我好細膽㗎。」難道是怕食檸檬！「係唔知點搞，我唔識點樣去追，約佢去街又好尷尬，所以成日都話要慢慢嚟由朋友開始。」有說執輸行頭慘過敗家，如此慢熱會錯失很多拍拖良機，「我係慢人幾步嗰啲，要識咗慢慢相處，覺得呢個女仔幾好先再慢慢睇吓有冇機會，但喺呢段時間佢可能已經拍咗拖或者結咗婚。」

選擇困難症
雖然有點龜速，但馬明亦會有追女仔的時候，「始終男仔追女仔，唔通等個女仔追你咩，我未去到咁有魅力要女仔追我。」而不知從何時開始，他亦變得「大膽」起來經常口花花撩女仔，「撩嚟撩去咪又係嗰幾個，楊怡、陳敏之、李詩韻，大家熟知道無傷大雅先敢撩，但對住唔熟嘅女仔就唔係好敢口花花，其實好多女仔我都覺得幾好，某程度上我都幾花心，可能我有選擇困難症，有時喺Canteen企喺度望住個餐牌，可以睇好耐都唔知食乜！」花心，有選擇困難症，但又不敢採取行動，那應該是有色心冇色膽吧！「可能係，同埋我係好蠢嘅人，所以我從來都唔敢一腳踏兩船、唔夠膽出軌，真係好佩服啲男仔點可以瞞到幾個女仔，我一定死梗，大時大節點分身？好辛苦，所以我寧願搵一個真係好好嘅女仔，疊埋心水一個對一個就搞掂啦，所有嘢簡單啲，我係好怕煩、怕複雜嘅人，一煩我就好驚！」
家人最重要
馬明一向出名愛錫家人，由入行至今都堅持跟父母同住，選擇老婆跟母親相處到也是常識吧，「我好驚啲婆媳關係，最好同我媽咪相處到，所以都Touch Wood同我拍過拖嘅女仔同我媽咪嘅關係都OK嘅，我依家都未試過有一個我阿媽話好唔鍾意嘅。」婚後都會跟母親同住？「我知道係幾難嘅，就算搬出去大家有大家嘅空間都要喺附近。」
前年首度正式拍電影《緣來是遊戲》，在內地大收旺場，但他新一年的目標不是進軍影壇，亦不是爭視帝，而是買樓！「你問我實際啲嘅目標都係錢，我想搵一嚿錢係令成家人都有保障，可能我現實啲啦，我14年已經睇緊，我發覺揀樓仲難過揀女朋友，有時有啲樓我覺得幾好，但係我買樓係同屋企人住，要過我媽嗰關，又要過我大家姊嗰關，有時我上樓盤睇覺得幾好呀，但我媽同家姊唔鍾意，有啲佢哋啱嘅，但就超出我能力範圍之外，『呢間貴得滯喎媽，要再儲多一兩年錢先得』，佢哋對女仔反而要求冇咁高，我阿媽話正正經經、斯斯文文就OK㗎喇！」
成熟男人味
無數人說，好男人的條件就是愛錫家庭，馬明認為應該多陪伴父母，即使放棄北上拍劇搵銀的機會，「我間唔中北上工作當然無任歡迎，但成年都喺上面就唔得囉，始終我屋企喺香港，我阿爸阿媽都喺香港，我會掛心，佢哋年紀開始大，你諗吓我到依家都同屋企人一齊住，可以對耐啲咪對耐啲囉！ 」強調自己現實的馬明，其實名利在他心中的排位，遠不如父母重要！「我都係一個幾family嘅男人，可能有人Like，有人覺得冇情趣，但將來我嘅另一半一定會欣賞我呢樣嘢！食幾多，着幾多整定嘅，我唔強求，隨遇而安，焦頭爛額去爭取，未必好。」
metro