【七年之癢？】前港姐譚小環

anniwo

【七年之癢？】前港姐譚小環：
要小心啲，去啲地方係冇人影相



今日有周刊爆，前港姐譚小環老公蔡強榮除咗婚戒去圓方蜜會長髮索女，最離奇係唔止小環老公背妻偷食，原來長髮索女都有個正印男友，關係認真夠混亂，話晒同老婆結婚都踏入第8年，唔通依家先嚟七年之癢?

本報今日亦向小環求證，佢就講：「睇過呢篇報道、相及片段，我真係覺得呢啲飯局只係普通聚會，完全冇問題，唔係周刊報道講嘅指控。」

被問信唔信老公，有冇怪佢唔「檢點」，點解周刊問佢有關老公偷食一事，小環當時口窒窒，小環坦言：「我係絕對相信我老公，唔通叫佢喺一個普通飯局，或者食飯都要檢點啲，唔好咁誇張啲動作，或者唔好出聲講嘢，其實呢啲唔係好make sense，點解有時睇片會口窒窒，因為噚日實在太突然，我亦需要時間去消化啲圖片，究竟發生咩事，諗吓點答，講嘢會慢咗啲，而畀佢哋講成『口窒窒』呢個代號。」

問及小環同老公感情點，小環答：「我哋感情相處好好，加上老公份人比較幽默，我哋溝通方法，佢經常引我笑，我完全唔覺得我哋有問題，佢真係對我好好。」咁以後會唔會唔畀佢單獨約異性，小環表示：「咁我又唔會唔准佢再單獨約異性，每個人都有自己嘅朋友，自己嘅空間，但就要小心啲，去啲地方係冇人影相。」