一人剪髮店剪髮二十元

andy88

【東方日報專訊】【專案組報道】 近年各區出現一人剪髮店，老闆要剪髮，且要洗頭並恤髮，收費最平二十港元起，甚至將頭髮分區逐區計錢，務求找到生存空間。
「經驗師傅服務，剪髮二十元」，六十七歲的理髮師傅潘伯扎根深水埗海壇街八年有多，店舖內只放得下一張理髮椅、洗手盆及小量工具。舊式理髮舖在香港買少見少，潘伯惟有以平價淨剪二十港元作招徠，「收得貴少少人哋都唔嚟啦，呢區大把剪髮舖，人哋仲會有埋按摩添。」
潘伯表示，日均接待約二十位客人，如客人要求洗頭和剃鬚，則收附加費五元至十元不等，生意勉強能維持一家生計。店舖以做熟客生意為主，部分客人已幫襯六至七年，但區外客居多，反而街坊較少。
老派講求快靚正 力銷經驗
學徒出身的潘伯從事理髮師已近四十年，過去在北角、荃灣等均曾開設理髮店，形容理髮店「易開難守」，「開舖可能一張櫈、幾把鉸剪已經夠，但有客嚟到，點樣留住佢哋先係最難！」他又指，老派理髮店講求「快、靚、正」，與新式髮廊不同，「好似呢啲剃刀，依家啲髮型師未必識揸，識得揸嘅都係老一輩。揸呢啲刀，一唔小心，一剃就剃走人哋成忽肉！」
「其實都唔知啲客滿唔滿意服務，都唔會即時講。佢哋返轉頭可能係因為服務，亦可能係因為價錢，有好多因素。」潘伯一向只堅持「做好自己」。現時該店佔地雖小，每月租金仍要約二千元，潘伯坦言如業主加租，便考慮不再營業，隨時再少一間老派小店。
舊區飛髮舖 推優惠吸客
同樣選擇於深水埗區開設小型理髮店的晶姐，其店舖位於區內商場高層，標榜平價單剪五十元，「始終深水埗係舊區，多學生，仲有啲獨居老人，唔可以定價太高，但又要交租，又唔可以收得太平。」現年四十八歲的晶姐，十七歲時已在內地開設髮廊。
商場高層人流或會較少，故開業數天，晶姐已想出不同優惠，冀能以奇招吸引新客，如「剪三次後第四次半價」等等，更有「淨剪劉海收三十元」的安排，「諗住人哋修少少，費事收咁多錢啦！」但晶姐擔心招數未必有效。她表示會持平常心對待生意，現時只寄望周末和假日能有更多客人到場，「希望賺到夠交租啦！」

andy88

reciver

reciver