熱飲致癌？

topto

前日《蘋果日報》有則新聞，題為「世衞將高溫飲品列致癌物」，報導世衞屬下的國際癌症研究機構（IARC）發表報告，將高溫飲品列為2A級致癌物，咖啡則降為3級，文章近四十萬點擊，一萬個讚。家母看了報導，即憂心忡忡勸我：「好心你唔好飲咁多咖啡啦，咖啡係3級致癌㗎，就算飲，都係飲凍咖啡好啦。」
「阿媽，查實你明唔明咩叫3級致癌呢？」我沒好氣地問。
家母毫不猶疑地答：「我知，3級即係話致癌風險唔高吖嘛，你唔好當我哋呢啲師奶咁蠢至得㗎。」
我忍不住反駁：「咁咪錯囉，IARC嘅致癌物分類，笨唔係代表致癌風險。懸浮粒子、酒精、陽光、香腸、火腿，全部係1級致癌物，而X光、核爆嗰陣釋放嘅中子射線，亦都係1級致癌物，咁係咪代表你食香腸，飲紅酒，危險性就等於核爆？如果係，去沙灘曬太陽嘅人，豈不是全部都係死士？聽日我落茶記叫份腿蛋治，咪變咗俄羅斯練膽大法？」
家母當場怒髮衝冠：「衰仔！為你好啫，駛唔駛咁串呀？」
我只好耐心解釋：「IARC嘅致癌物分類，只係代表研究人員有幾多證據顯示邊樣嘢致癌，但個分類冇話你知每樣嘢嘅致癌風險有幾多，明唔明白？1級致癌，係指有充足證據確認某樣嘢對人類致癌；2A級，係表示對人類致癌嘅證據有限，但對動物致癌嘅證據充足，2B嘅證據比2A更少；3級代表冇充份證據顯示對人或動物致癌。分類係表示有幾多證據，唔表示風險，即係話，有1000份證據確認A會增加1倍患癌風險，有1000份證據確認B會增加1000倍患癌風險，A同B都係1級。嘆杯熱茶啫，又唔係核爆。」
家母想了一會，最後說：「講致癌分類，你啱。但呢個世界唔係樣樣講證據㗎傻仔，你又有證據證明大陸跨境執法咩？李波咪又係返咗去。」  

topto

（中央社綜合外電報導）世界衛生組織（WHO）旗下國際癌症研究中心（IARC）曾將咖啡列為2B可能致癌物質，不過近日發表的研究結果指出，問題不是出在咖啡，攝氏65度以上的熱飲，可能會導致食道癌。