微波爐叮食物無益?

dian

唔知係咪受MIB（Men In Black，電影《黑超特警組》）影響，好多人以為微波爐係外星人傳入，好高科技，所以佢哋對微波爐既驚且懼。最常嘅講法係：


「微波爐有輻射！」


「微波爐好易爆炸！」


「微波爐叮食物會令流失營養！」


首先講微波爐原理。微波爐可令食物加熱，其實係由佢嘅產生嘅微波，令食物嘅電分子（主要係水份子）同微波嘅電子產生物理反應，因而產生熱能，整熱食物。而佢嘅微波，其實同大家部手機產生嘅電波、或者同太陽嘅光線，屬於同一級波頻。佢比起X光、紫外線，以至伽瑪射線，都係屬於低頻率嘅電磁波頻。講完一大堆科學知識，即係話：


如果大家唔怕用手機，咁就唔使驚微波爐
微波爐嘅所產生嘅輻射絕對唔係核彈類型，佢同太陽光嘅輻射同一類。即係話叮食物同將啲食物放喺太陽低下咁，都係一樣安全
只要用適當嘅器皿叮食物，微波爐係唔會爆炸。你煲水唔記得熄火應該仲危險！

dian

用微波爐整食物，唔好大安旨意，係要畀心機架。


咁叮熟嘅食物對人體有無害？營養學家話：


1. 會流失營養？
所有烹調方式都會令食物嘅營養流失，但微波爐因利用微波在食物直接加熱，所以反而可以保存更多營養。其中蔬菜嘅抗氧外成份（預防癌症嘅成份），用微波爐煮保存得最好！ (1, 2) 要注意係，用微波爐加水煮要西蘭花係會破壞要西蘭花嘅營養(5)，亦唔應該用微波爐翻熱人奶。(6)


2. 破壞有害物質
有研究話，煙肉（bacon）入面嘅亞硝胺，加熱後會產生亞硝酸鹽，係致癌物質。但煙肉經微波爐煮熟，可以減少亞硝酸鹽嘅產生。(7) 另一項研究話，雞肉用微波爐煮熟，比起用油炸，會產生更少有害嘅物質「雜環胺」。(8)


3. 殺絕細菌
由於微波爐對食物嘅加熱係由內至外，所以比其他烹煮方法，較有效殺絕食物上滋生嘅細菌。

dian

微波爐用得唔好，未必一定有安全問題，不過搞到一鑊粥要清理，都唔係講笑。


同場加映：微波爐使用貼士


用印有「微波爐適用」嘅器皿（瓷或玻璃或塑膠），千祈唔好用金屬器皿，會爆炸的
唔好成隻雞蛋放入爐。部份有包裝嘅急凍食物，亦要剪開包裝紙先放入爐
翻熱食物可灑點清水在食物表面，或放杯水入爐，令食物保持濕潤，會好食啲
叮嘢食盡量用個有洞嘅蓋冚住啲食物，因為油脂遇熱會彈到成個爐都係
唔肯定要叮幾耐，可分段叮幾次，更要不時睇下個爐。我親眼見過喺大學宿舍，有大學生將一個饅頭用大火叮咗九分鐘，最後成個爐燒咗
小學雞數學題目：一隻雞蛋烚五分鐘就熟，十隻都係烚五分鐘。但用微波爐叮嘢完全唔同，越多食物就要用越耐時間
叮液體（如牛奶），飲用前一定要攪勻
千祈唔好叮礦泉水（我連清水都唔敢），據講叮完出嚟會飛濺