王祖藍 我為亞男

charley

王祖藍 我為亞男       


王祖藍擔任編導的《老表，你好嘢！》叫好叫座，更加捧紅不少劇界新人，好似「細細粒」陳嘉佳、林盛斌（Bob）、「鬼妹」陳明恩、張繼聰等，祖藍可說是新一代的「點金勝手」！續集《老表，你好hea!》連女友李亞男也來湊熱鬧，祖藍為她度身訂造一個醜角，明顯為女友鋪路。



文：鄺蔚霆    攝：Daima

上集以中港矛盾為題令不少觀眾引起共鳴，今集《老表，你好hea!》講及香港內部分裂，與現實中的「佔中」相近，祖藍表示：「上年見到立法會入面掟嘢，有好大爭執，預計到呢樣嘢會愈來愈嚴重，《老表》精神係諷刺時弊，希望以一個嘻笑怒罵形式去講社會百態。」《老表，你好hea!》主線講郭晉安和萬綺雯分別有泛民及建制派的政黨背景，祖藍指現代的《羅密歐與朱麗葉》不是因為家族仇恨，而是兩個相愛的人，因為不同政見而未能一起，「呢個比喻都係講緊依家所有香港人！」時下社會因為不同政見而引發「Unfriend」、「Unlike」潮，他指目睹兩個認識30年的老友因為這件事反目， 「好可惜！政見竟大過感情，可能佢哋本身都有問題，但係值唔值得呢？喺我心目中，感情係大過政見，入面安仔有一句同阿媽羅蘭姐講『呢個世界唔係淨係得我，但我淨係得你！』呢個香港都係，政見係需要爭取，但屋企人得一個，朋友都係得一個，建立香港係要愛！」祖藍希望可以令大家思考一下。

嗌交論
祖藍預告，蚊蚊和安仔會為了愛情而放下所有矛盾，更為對方作出改變，「嗌交究竟係着重關係、面子或對錯呢？兩個人嗌交都會話對方唔啱，迫對方去諗自己諗嘅嘢，其實兩夫婦如果永遠爭拗對錯，就無止境拗落去。着重大家的關係時，自然會放低一啲道理，咁點解要Push大家啫？你諗你、我諗我，咪OK囉！」正如鍾景輝（King Sir）跟安仔是反面廿多年的父子，King Sir再次跟安仔見面時，跟安仔表示其實一直想講一聲「對唔住」，而安仔亦表示一樣，問到對方為何不講時，雙方竟說：「等你講先呀嘛！」祖藍談起這段戲即沒好氣說：「咁就等咗廿幾年，就係因為放唔低面子，其實依家好多嘢，一句誤會，一句對唔住咪搞掂囉，唉！撐咁耐做咩啫！」

發掘滄海遺珠
《老表》再次成為熱話，不過祖藍肯定指不會再有第三輯，「唔會喇，續集係因為盛情難卻，但其實我心目中已經有另外一啲故仔。」而另一個主要原因，是祖藍有感《老表》這個班底已經「上岸」！「 啱啱見到王菀之有幾套電影，張繼聰啲劇冇停過，阿Bob、肥妹、鬼妹啲廣告亦從來都冇少過，呢班人已經上咗軌道，佢哋好忙㗎喇，我唔使再畀嘢佢哋做，我想搵另一班人出嚟，我心裏面仲有一啲滄海遺珠，好似《Sunday扮嘢王》咁，都見到一啲平時冇見嘅藝人。」說來真有點像星探！他表示真的「好想好想好想」發掘多點人才，「因為根本唔夠人用！做演員要好等機會，依家好多人怨冇機會，如果我有能力製造多啲機會，就製造多啲。問他邊位藝人有潛質？他笑言：「吳廣德（唔講得），講咗咪畀人用，總之係平時大家唔為意，今次我擺得重戲喺蔣志光同韓馬利身上，呢啲人平時日日見，但點解冇一套代表作？我好想寫一個代表作畀佢哋，如果佢嘅代表作喺我手上出嚟嘅話，會係我一個榮譽！」

女友做醜角
當然，能夠受惠祖藍的「勝手」又點少得女友李亞男，祖藍安排了一個「茄喱啡」角色給女友，二人破天荒在劇集合作！雖然祖藍在劇中經常要鬧她，但其實十分疼錫女友，更大讚她演技好又有喜劇細胞，「自從我哋拍咗拖之後，佢釋放咗呢樣嘢（喜劇細胞），佢咁多年嚟都好認真、好正經，出嚟行路都好似行Catwalk咁，好有Manner，但依家佢釋放咗一樣嘢，就係鍾意玩，我要佢做醜角， 冇諗過佢肯放低身段。」祖藍果然用心良苦，為捧女友絞盡腦汁！
祖藍直言自己是個大男人，「我係一個傳統大男人，佢就係一個小女人，但我要學吓唔好咁大男人，佢亦又要學吓唔好咁小女人，要有主見啲，唔好成日淨係聽我講，佢係一個比較猶豫嘅人，但冇辦法，針冇兩頭利，要一個人溫柔就得人，缺點自然就係憂柔寡斷；要一個人好帶領你，自然冇咁就你，所以一定要衡量，我愛佢邊樣，就要接受佢邊樣。」
婚姻大事豈能草率
跟亞男拍拖差不多6年，婚訊傳出多次卻只聞樓梯響，祖藍承諾婚期不會太遠！「大家都有傾吓，但有好多嘢要諗，我依家好忙，成日要返大陸，佢又要拍劇，唔係話要郁就郁到，我個時間表已經排到下年年中。」但女友亦步入30歲中女階段，不能放棄少少工作時間結個婚嗎？他笑言有想過即興旅行閃婚，「我哋啱啱同藝人之家幾個藝人去美國做布道會，經過拉斯維加斯嗰陣，都有隨口吹水話不如即刻結婚啦，啲人話入到去唔使排隊，簽個名就得，哎呀，早知咁做啦！」但一早明言是傳統大男人的他，婚姻大事又豈會草率？「要對雙方父母交代，呢啲係好放縱嘅行為，如果我係咁，我晨咁早就結咗婚啦，我哋都係講笑咁講啫！一定要風風光光娶亞男！ 」
談到生B這人生大事，他亦笑言二人有講過這個話題，「我哋兩個都好忙，冇乜時間拍拖，唔會想咁快生B，而且我唔想佢唔甘心，希望佢有啲咩未試就試晒先，我唔希望佢第日後悔！」未試過就試晒先？祖藍原來是個為女友着想、又大方的好男人！
Metro