娜姐斟Jessica搶攻韓胸業

domin

娜姐斟Jessica搶攻韓胸業

女神周秀娜升呢做內衣女王！娜姐接受最新一期《好報》專訪透露，斥資八位數字打造內衣王國，封胸一年的她，更拍噴血內衣照做埋生招牌！向來食腦的娜姐早前巧遇韓國女神、前少女時代成員Jessica時，更力邀對方Crossover參與內衣設計，實行打「女神牌」，擴建其內衣王國，連韓國市場都唔放過！

明年就踏入三字頭的周秀娜諗頭多多，自約滿內衣代言人後另起爐灶，娜姐在昨日出版的《好報》中，自爆今年底會推出自家內衣品牌「LaaNaa」，還希望兩年後進駐中環買億元舖，五年後可以上市，打造內衣王國！娜姐還自己做埋生招牌，破「峰」出擊解禁咪咪！

「大家坐低慢慢傾」

娜姐今次斥資八數字搞新品牌，自言不成功便成仁，除希望可以物色中外知名模特兒或女星做代言人外，還望邀得猛人與她Crossover，參與設計新Bra Bra！娜姐上月到海口出席活動時，巧遇韓國女神、前少時成員Jessica，兩位女神一見如故，據知，擁有自家設計眼鏡品牌的Jessica贈予娜姐Coupon，娜姐即打蛇隨棍上，力邀在美國讀過時裝設計的Jessica參與內衣設計，希望有錢齊齊搵，當時對方亦希望有朝一日可以合作。

本報致電娜姐，問到是否邀請Jessica加入設計團隊或搞品牌Crossover？她說：「當日同佢傾咗好多嘢，講扮靚心得之餘，都有問Jessica有冇興趣參與我嘅內衣品牌設計，佢都話大家可以坐低慢慢傾。」娜姐謙稱自己未到女神級，Jessica才是真正女神：「佢真係好靚，又有生意頭腦，係一個智慧女神，如果可以搵到佢合作，可以打入埋韓國市場！」問有否與Jessica傾價錢？娜姐即笑謂：「我哋講心唔講金，如果要講金，我諗真係好貴，惟有自己慳住使！」

大爆娛圈潛規則

在《好報》專訪中，娜姐除了大談生意經外，入行近七年的娜姐還把娛樂圈的潛規則娓娓道來：「我唔敢講自己好聰明，但入得呢行就要清楚自己做緊乜，要有目標，每一步都要計劃，唔係人哋叫你剝就剝，剝都要有Point，唔係你知道有潛規則就舂個頭埋去。過往都有唔少飯局同神秘電話搵我，但我只係一個模特兒同演員，呢啲嘢唔包，Sorry！」談到會否欽點接班人？娜姐認為「周秀娜」只得一個，無人能代替：「接班人？冇心水喎！由出道到依家都係做好自己嘅事，留意自己想做啲咩，好少去留意其他人。出道時畀人叫做『翻版樂基兒』，咁我係開心嘅，但係我都需要用時間令人記得我係周秀娜。如果有人叫做『翻版周秀娜』，我都唔會咁鍾意，因為都幾慘o架！你要用一段時間去令大家忘記個稱號，而去記得你，我覺得最緊要都係做番自己。」

東方

文：專案組

yulun