子珊揚言要減產

pionerla

Weekend 戲味之對決 佘詩曼、徐子珊       


當今香港電視圈的花旦，買少見少已是鐵一般的事實。能演的、有戲味的，寥寥可數，佘詩曼（阿佘）肯定是其中一人。無論在《酒是故鄉醇》「橫水妹」的純樸、《金枝慾孽》「爾淳」的攻心計、《使徒行者》「釘姐」的亦正亦邪，演出都絲絲入扣，入木三分。

有戲味的花旦還有一人，徐子珊。08年亦憑《跟蹤》演「豬女」一角，擊敗芸芸對手，勇奪金像獎最佳新演員。兩位實力派演員同樣角逐今屆視后，誰勝誰負，她們不太在乎，想的，是合作拍劇齊鬥戲。

佘詩曼06年憑《鳳凰四重奏》成為雙料視后，徐子珊08年亦憑《跟蹤》勇奪金像獎最佳新演員，兩位當家花旦演技精湛早已被肯定。今年台慶頒獎禮，一同提名視后的二人再次成為大熱，當中阿佘奪視后的呼聲較高，子珊亦甘拜下風，早在阿佘抵達前，偷偷寫了大字「Congratulations阿佘！」預祝阿佘奪視后！子珊以半棄權說：「盡咗力啦，我投票都投畀阿佘，可以同佢相提並論都好難，唔係嗰個級數嚟㗎嘛，今次直頭係越級挑戰！我自己都有睇《使徒行者》，佢真係演得好好！」阿佘即多謝子珊：「我都睇好你，大家可能覺得我演呢個角色演得好，但換轉如果我演你哋啲角色，效果未必有你哋咁好，如果我演家燕姐《新抱喜相逢》個角色，我又未必做得到咁嘅效果，其實每個角色都有難度，我接《使徒》嗰陣都唔知係咩角色，同埋拍嗰時係飛紙仔，都唔知效果出嚟係點，有唔錯嘅迴響，係Unexpected！」

借「傷口」去演戲
今年已拿下新加坡和馬來西亞視后的阿佘，指如果再下一城就錦上添花，但阿佘認為得不到視后也沒所謂。對於從未拿過視后的子珊，亦表示志不在獎，「獎係攞唔晒嘅，攞咗一個就要攞第二個，呢個世界咁多頒獎禮，唔想無止境去追求呢樣嘢，要追，就追求演技同知識上嘅進步。」 其實子珊在《再戰明天》的角色亦十分多內心戲，「角色有童年傷疤，所以我都攞咗我童年一啲傷口去演，因為我屋企由細到大都用籐條、衣架打我，細個冇為意覺得好正常，但到依家仲會記得， 呢樣嘢無論係正面定負面對成長係會有影響。」

自阿佘回巢拍《使徒》時，巧合地與子珊同屬一個經理人，子珊表示十分遺憾還未有機會向阿佘學習，而阿佘亦希望跟子珊做戲，兩人希望一齊演一部女人戲，阿佘說：「好似《女人俱樂部》咁嘅女人戲啦，有晒咁多個花旦一齊拍，好似《金枝慾孽》嗰陣時咁，我哋幾個女仔表面競爭得好激烈，其實私下合作得好開心、愉快，不過一入片場就真係真功夫去『鏈過』㗎！好好玩 。」子珊即點頭說：「係呀，女人戲好，多啲機會大家互動，如果唔係佢又同其他男仔談情說愛，都唔係同我拍嘅，咁就搞唔掂。」

人有多重性格
不經不覺，阿佘已經入行17年，而子珊亦踏入第10個年頭。回顧那些年，憑《十月初五的月光》上位的阿佘竟指轉捩點不是在此劇，反而是在2001年播出的《酒是故鄉醇》。「當時我知道呢套劇係全外景製作，覺得好特別，係我自己敲珍姐（曾勵珍）房門同佢講『我好想拍呢套劇』，係第一次，亦都係唯一一次好主動咁話想拍，結果我係冇選擇錯誤，原來當一個演員去到實景，真係做嗰樣嘢，好似拉橫水渡，當每日都喺嗰度同村民鄉民一齊生活嘅時候，會覺得生活同演戲融為一體，開始享受演戲。」阿佘表示正在等待別人發掘她的潛能，「我覺得人係有多重性格，只不過係咩時候發放邊種性格出嚟，可能有好多未發掘出嚟，但當你預到個角色、劇本，就識得攞嗰部分出嚟發大嚟演，做演員好玩嘅地方，就係演唔同嘅人生。」

劇接劇頂唔順
至於一入行便歌、影、視三線發展的子珊則坦言只想繼續作多線發展，從來冇想過將重心偏向哪一方，「因為我好Enjoy演戲，又可以Make a living（生活到），仲想點啫？做人唔可以咁貪心， 唔可以每樣嘢都係你，以我呢個條件嘅人，得到嘅嘢已經好多。」今個暑假去了紐約上演戲班的子珊，坦言拍戲久了，連思維都會掏空，「演戲多，覺得唔夠嘢用，想再進步就要增值，近年自己減咗產，想重質素，希望花時間去準備角色，對我嚟講劇接劇我應付唔到，其實唔使拍咁多，想好似阿佘咁返嚟拍一套就中。」談到下一個10年，她笑言是時候發展副業，「近年我開始玩瑜伽，對心靈上嘅嘢好有興趣，好似催眠、佛學咁，我都有睇呢方面嘅書，我都鍾意讀書，或者半年讀書，半年演戲啦！」

No pain，No Gain
子珊揚言要減產，那早已上岸的阿佘有想過生活得悠閒些嗎？她笑言成日都這樣想，「唉，我成日都覺得自己只係一個普通女仔嚟啫，點解要捱得咁辛苦，但係啲工作就不斷咁推我向前行，12年拍“4 In Love”嗰陣，吊威也吊咗好耐都未落到嚟，當時我吊喺半空，心諗『依家喺度為咩呢究竟』，之前已經拍咗18個鐘，已經天光成11點喇，好想放棄，休息吓，但係一到放我落地，行去睇返Playback，自己好滿意個鏡頭，原來當你有滿足感嘅時候，咩痛苦都唔記得 。」阿佘果然是事業型女性的典範，她笑說：「我都係㗎！」
二人都認同自己是個十分幸運的女仔，有人說成功是「三分幸運，七分努力」，阿佘表示：「呢個世界冇不勞而獲，每個藝員都係捱出嚟，睇吓佢哋點處理、平衡自己心態，點樣去不停增值自己，我哋每接一個劇其實要做好多嘅功課，唔係憑感覺。」子珊覺得每個人需要有夢想才能令事件成真，「但大個咗就知道其實有好多嘢唔係你想要就一定有，反而要珍惜你所有嘅嘢，同埋享受呢一刻。」
尋找另一半
然而，女人最後都希望找個好歸宿，阿佘說：「一個完美人生，當中包含成長、事業、家庭、子女， 先為之一個完整生命，只不過我放咗大部分時間喺事業，縮短咗家庭生活，但我相信我會搵到、會遇到，仲有憧憬！」此時子珊已開到口大呼恨嫁！不過那麼出色的兩位女性，竟然還是單身，難道是要求太高？子珊嘆道：「我信命，相信每個人條路唔同， 我唔知婚姻係咪最適合我，但我會鍾意有家庭。（聽落成個小女人一樣喎！）我都偏向小女人，我鍾意聽老公話，鍾意倚靠。（鍾意哪一類型的男士？）我唔要呢一行，因為我鍾意嘅人又可以仰慕佢，喺每日都可以話到啲新鮮嘢畀我聽，同埋成熟、照顧到我囉，不過依家遇唔到，唔好強求。」阿佘認為：「愛情要嚟，擋都擋唔到。唔嚟，拉都拉唔番，講緣分。」而她所想的另一伴條件亦是十分簡單：「溝通到係最緊要，人係獨立個體，冇可能兩個思想完全一致，但大方向相同已經OK，最緊要相處得舒服，同埋可以做返自己，因為相處一世。」如果兩位開到聲搵男友，由電視城排隊排到尖沙咀啦！
METRO