黃秋生笑言：「人生如戲。」

steelpins

黃秋生       
外表酷爆帶點惡的黃秋生，向來敢言兼惹火，兩個月前正當香港發生佔領運動時，他人在上海拍劇卻心在港，不時發表個人睇法，秋生感慨話：「幾時香港會變成咁？」

然後他被導演王晶Unfriend，還盛傳被列入不知是否存在的封殺名單，多事之秋，他卻在上海拍《梟雄》，角色是一個暗中撐學生運動的人物，被鬧是漢奸，劇中的對白是：「我講乜都冇人信。」
虛構的劇情和現實碰上，是巧合？秋生笑言：「人生如戲。」

撰文：羅婉玲
攝影：豪
化妝：Jolinn Ng
髮型：Jeff Wu
服裝提供：TOUGH Jeansmith
場地提供：香港演藝學院
嗚謝：香港演藝學院校友會

黃秋生是演藝學院表演系首屆畢業生，講演技毋庸置疑是神級，說教戲，他去年拍住師妹甄詠蓓開辦神戲劇場，學生來自各路人才，演戲多年的林嘉欣也來求教，年尾他們再度開班，談起這種一連七日的密集式教學，學員學懂幾多，又明幾多呢？秋生話：「可能學完都唔明㗎，資質唔同吸收又唔同。」
入行接近30年的秋生，演過的角色不計其數，他去年成立劇團作教學和辦劇培育後輩，又參選藝術發展局成為藝發局委員，繼而拉攏演藝學院同學成立校友會，他還差點半隻腳踩入演藝人協會。
53歲的秋生心中仍有團火，還有很多更想做的事，他說︰「教戲、寫書﹑搞舞台劇同埋搞好自己身體，身體有乜事？冇㗎，行條樓梯都氣喘，皮膚差，頭髮又冇乜。」
此時此刻，正是他被傳列入封殺名單當中，問他可有影響？他說︰「可以話有，亦可以話影響唔大，基本上我好少返大陸拍戲，有啲電影又話唔敢開，有啲又話收到信，但又攞唔出證據。」秋生對是否有那份封殺名單，仍半信半疑，好像他之前拍的黑社會題材電影《大茶飯》忽然在內地上映，他說︰「講真我傾呢部戲時，係冇大陸市場，有的話係兩個價錢，唔知點解套戲又上咗大陸，但冇畀過錢我，咁都算，又話封但又上到，我真係好唔明囉！根本理都唔想去理，連封殺我嘅理據都戇居，鍾意話乜就乜，漢奸呢樣嘢，你話南京大屠殺關我事都得啦！」

機會留給有準備的人
既然如此，秋生趁這段「空閒時間」想做就做，包括陪伴家人，他說︰「咁啱今次咁，我有時間執吓屋囉，陪下阿媽多啲，佢80幾歲人，中咗風，我日日都去睇佢，我唔想自己將來後悔。」說到太太和兩名兒子？秋生話︰「太太未有時間陪，就嚟詐型，小朋友唔需要我，大仔都18歲，惟一擔心咪啲仔仲讀緊書囉！」
做藝人要懂得積榖防飢，秋生經常跟學生同後輩這樣說︰「今日唔好以為你紅，可能你聽日就出事，又唔好以為你唔紅，可能你聽日紅咗，紅咗又唔好牙痛咁聲，唔紅你又唔好怨，有時間咪進修囉！」秋生自言生活簡單，不會着重物質，他說︰「我幾十歲人食得幾多，着衫有Sponsor，條條牛仔褲都穿窿，食得唔多，一日淨係食一餐，點解？健康啲，有無三高（血壓、膽固醇和血糖）？我唔Check，咁嘅年紀運動少，食得多咪大肚腩囉，我咁多飯局，一年都食唔晒啦，斷食半日有乜所謂。」

容易着火的男人
坐在母校演藝學院接受訪問的秋生，問他點睇近日多事的香港，他望出窗外並問身邊人：「外面起乜嘢。」對方說：「會起一幢教學樓。」秋生接着說：「我以為外面起道牆?！」然後他又回過神來皺皺眉頭說：「幾時香港會變成咁？嗰種對立、搞事、互相指摘對罵，幾時變到咁㗎，香港以前唔係咁㗎。」
9月尾香港發生學生佔領運動，秋生正身在上海拍無綫劇《梟雄》，湊巧的是劇情又是學生運動，他演的角色暗地裏撐學生，拍最後一場法庭戲，秋生的對白是：「你哋鍾意點就點，我講乜都冇人信。」他形容自己表面上心平氣和，卻耳朵泛紅。他說：「就係咁啱得咁橋，喺呢個moment，真係人生如戲。」
秋生向來愛表達個人意見，但往往卻易惹火，他承認︰「我條命就係火重，好似拍《梟雄》咁，我真係要講番，今日收到監製Message唔多高興，話我喺訪問度講套劇小學雞，我唔係咁講，我係話寫劇本個編劇寫到個角色好小學雞，監製同編審都知個劇本值50分㗎。」

暢所欲言冇包袱
對於佔領運動，秋生明言：「我上岸啦，仔又大，樓又供完，我唔出聲可以繼續安享晚年，我知講呢啲嘢會瀨嘢，但係我對自己土生土長嘅地方，感到同情，講真，街頭抗爭Not my cup of tea，我早就話我幾十歲人，唔會用咁嘅方法。」
秋生認為各有各睇法，他說：「我又唔信全港嘅傳媒淨係影到警察扑濕人，又影唔到啲人扑濕警察呀，我都想睇吓有冇相，無論點都好，我只係對件事，紀律部隊冇紀律，仲紀咩律部隊，市民學生衝動係正常，紀律部隊係受過訓練，手上揸住武器㗎！幾危險呀，咁係咪更加要忍耐？」
秋生表示自己只是一個觀察者，去看整件事，兩方面都有對有錯，但他看到一些藍絲行徑，他又忍不住說：「唔好做低級老千，講埋啲歪理，係講都講得聰明啲，我都會拍手掌呀，依家只要你話地球係圓，佢哋就話係四方，永遠為反對而反對，好笨！」

演藝界不再團結
曾幾何時演藝界那股團結力量，為災難籌款，為反暴力而遊行，為業界爭取資助或福利而發聲。來到這年頭，演藝界發聲少，甚至面臨萎縮，秋生話︰「仲發乜嘢聲，電影又冇，電視得一個台，唱歌又冇，上大陸又話難。」
然而在黃秋生身上，更發生被導演王晶Unfriend，被演藝人協會落閘拒諸門外的事，眼見演藝界的團結備受考驗，可感唏噓嗎？秋生冷笑一下謂︰「當一個人要撼頭埋牆，見佢起跑緊講佢知，你撞埋去會死㗎，但佢又唔信，最後咪頭破血流，你話有幾唏噓啊！我拍爛手掌呀，我拍咗廿幾年，90年代我已經講，啲人話我傻話我癲，講啲唔啱聽嘅嘢，終於咪死得囉，當你有得食嘅時候，你唔會居安思危。」
非演藝人協會會員
提起演藝人協會一事，秋生那團火又來了，他說︰「係佢哋叫我，我推咗好多次，曾志偉叫我去食飯，開埋會見埋班元老，我問係唔係搞得先，放手搞？我會大刀闊斧㗎，我會搵年輕會員加入壯大個會喎，都話得喇，最後我叫埋班內閣去到門口，竟然閂埋門幾侮辱，入會嘅會員要企喺外面個垃圾桶上簽名，我先至㷫，我搞好個內閣，叫埋人上嚟，原來係混吉，佢哋好驚好恐懼冇咗啲利益，利益只係去飲吓茶咋，以為我入嚟搞事，你估我好恨做咩。」
問秋生還是演藝人協會會員嗎？他說︰「我有一段時間冇交會費，最近改咗制度話唔使交，今年成龍大哥生日，叫我入去影張相留念，我問影乜相？原來係入會，咁我話Sorry我唔影喇，想?我影相早知我唔行入去，所以我已經唔係會員，都冇意義。」
撐何韻詩從政
當說到一股Unfriend潮，秋生抵死的說︰「唔奇怪，地震啲老鼠曱甴梗係走晒出嚟，一啲都唔奇，有因必有果，呢個時候妖魔鬼怪走晒出嚟，我覺得非常之好，睇清楚成件事，邊個係 (契弟)，幾好呀，以後佢冇得去扮，全港都睇清楚晒，邊啲係人邊啲係鬼。」
在行內看得通睇得透的秋生，說到何韻詩考慮從政，秋生笑笑口話：「我打電話同佢講，你唔從政都嘥咗你，呢個係佢唯一出路，無得返轉頭，畀人拖落水都係咁話，第一佢有心，第二係命運，各樣條件都配合晒，要做就要攞正牌，到時無得話你多事，無得封殺你，唔通唔畀佢入立法會開會咩，佢搞得掂，有人投票支持佢咪得囉，唔唱歌，到時喺立法局度唱啦。」