九唔搭八 陳百祥

cock28

九唔搭八 陳百祥       


講認叻，陳百祥認第二，應該無人敢認第一。阿叻話，要永遠咁叻，竅妙是九唔搭八，「同人傾偈，要講一啲佢哋唔識嘅嘢，我見到記者就講炒股，佢識嘅我就講馬，總之就我講晒啦！」


訪問當日，叻哥與老婆黃杏秀為與蕭潮順合作的《好聲》書宣傳，叻哥卻刻意收起自己一點的傲氣，讓大家的目光重回慈善上。對答有紋有路。


叻哥與製作人蕭潮順最近發起《好聲》書，讓老人家可以一邊「聽書」、一邊睇書。蕭潮順說，概念於12年前已經實行過，「我同霑叔（黃霑）12年前都出過CD，當時啲老人家都好開心，之後再諗番呢樣嘢嘅時候，我就同阿叻傾，睇吓可唔可以做一本自己研發嘅新產品，將珍貴嘅聲音檔案錄低。」提到文化瑰寶，叻哥首選金庸的作品，「我哋由細到大都係睇金庸，秀姑直頭做過金庸小說嘅角色，而且老人家無乜機會睇番舊嘅電視劇或者節目，就算新嘅都未必睇得到，如果用講古仔嘅形式，會好吸引囉。」
勁過台慶
《好聲》書的錄音陣容絕唔嘢小，包括陳寶珠、羅家英、泰迪羅賓等，叻哥笑言最抵就是找來秀姑幫手，「搵佢唔使錢嘛，但最後蕭生都有封返利是畀佢嘅。好多人一講就應承，卡士仲勁過TVB台慶，都冇人拒絕過，就好似眾志成城去幫長者做件娛樂嘅Item咁。」其實進行錄音，與拍劇的性質相近，表情、動作都會不自覺地展現。

講起做戲，叻哥過去演過不少令人難忘的角色，《唐伯虎點秋香》的祝枝山、《鹿鼎記》中的多隆，甚至《精裝追女仔》的交通燈，單是想起都令人發笑。叻哥笑言，其實過去的角色大多都是演自己，「由頭到尾我都係做我自己，因為我個人好樂觀，由細到大我都好鍾意引人笑，其實我淨得一樣嘢未做，叫做棟篤笑，不過唔係天下無敵就費事啦，要絞盡腦汁自己度，我不如度馬仔好過。你睇吓周星馳頭髮都白晒，因為佢真係要自己諗嘛，我就唔同，我咩都係現場，用自己嘅反應去做返，同埋我唔用腦嘛，所以我個腦係最新鮮㗎！」
贏譚詠麟
說叻哥是天生的表演者，相信冇人反對。他忍不住提起自己演藝事業的另一高峰，就是歌曲《我至叻》，「我都冇諗過唱歌嘅，40幾歲人先嚟唱歌，仲要贏埋譚詠麟，其實我都唔想㗎。點知一唱完歌又冇得做喇喎，因為破唔到個高峰嘛，所以就會明秀姑點解唔做囉。當你做過晒所有嘢，好似喜劇我做過晒，遊戲節目都做過晒，去到個頂，再做冇意思，要破上次先會覺得過癮嘛，所以對我嚟講，我每日都要搵新嘢去嘗試。終於我發現到永遠都有新嘢嘅，就係賽馬，日日結果都唔同。」
霑叔教路
訪問中多次提起的《好聲》書，其實是霑叔的Idea，原來叻哥與霑叔都有點淵源，「我第一次做TVB港姐司儀時，就嗌霑叔做師傅，佢講咗幾樣嘢畀我聽，我到今日都受用。」所指的就是必殺的「九唔搭八」，為他創出自己的一套風格，「嗰時係EYT，入面又有肥姐、又有盧大偉，個個都係主持嘅前輩級人馬，得我仲係?仔，霑叔叫我一定要同人講啲佢哋唔識嘅嘢，好似講馬，我3,000幾隻馬識晒，20幾年嘅歷史都識晒，但係同練馬師傾偈，我就即刻轉話題，變咗永遠我都係on the top。」
metro