買一紮花唔夠再落訂

suker

            
娛樂CIB 買一紮花唔夠再落訂 王宗堯：有諗結婚

在港視劇《選戰》中突圍、36歲嘅男神王宗堯，人氣急升，密密拍廣告拍電影，不過幾忙都好，有啲嘢自己做好啲！日前娛樂CIB就見到呢位男神，揸埋新車去到太子花墟買花，買完仲搵個袋裝住，似乎怕畀人見到。CIB又見職員同佢寫疑似訂單，事後問番王宗堯係咪訂花畀女友，佢竟然話：「都未諗到。」嘩！花都訂埋，唔似未諗到送畀邊個囉！






曾承認和陳靜（DaDa）同浸大Ｅ神楊梓瑤 （Carol）拍過拖嘅王宗堯，上星期四（29日）黃昏喺太子出現，講過話想買樓買車嘅佢，揸住架新款白色Lexus去花墟，一落車就箭步過馬路，去一間專為情人節訂花的舖頭左揀右揀，王宗堯買咗一紮花，用紙袋裝住之外，見佢埋櫃枱同花店職員疑似提供資料訂花，之後就上車鬆人。
事後問番王宗堯是否買花送畀女仔？他在電話中說：「哦！係，係買花買畀朋友啫，有朋友生日。（咁你係咪訂定情人節嘅花？）都未諗到。」早前佢先後被拍到同「殘廁Coffee」林芊妤，以及周永恒小三Ruby（劉依靜）行街傳緋聞，男神就話：「緋聞嘅嘢未必係真。（情人節有冇節目？）想去吓旅行。（兩個人去？）係……同兩個以上嘅朋友去。（你都唔細，有冇諗住娶老婆？）結婚係有諗，不過自己未有經濟基礎，娶個老婆番嚟冇錢點開飯，費事累到人，起碼要諗買層樓先。（咁你係咪有拍拖嘅新目標？）有嘅到時話你聽啦！」
噚日王宗堯同師妹陳詩慧一齊出席活動，陳詩慧主唱劇集《選戰》嘅插曲“ I’ll be there ” 最近爆Hit，佢同王宗堯食住個勢，整咗首合唱版，仲模仿李逸朗翻唱《傻女》嘅哭腔，錄咗條段片放上YouTube，王宗堯就話：「依家怪叫係個熱潮，但我哋唔係哭喪版，係癡漢版。」對於《選戰》有冇機會拍第二輯，佢就話：「《選戰》收視係冇問題，係有機會拍第二輯嘅，只係等王生（王維基）點頭。」
metro