姊弟戀要考慮的4件事

9planets

一講起姊弟戀，唔少女生既忐忑又卻步，擔心對方年紀比自己細，唔知段感情work唔work。究竟開展姊弟戀之前，有咩考慮因素？

他夠成熟嗎？

兩個人拍拖，年齡並唔係最重要嘅因素。就算佢細過你，如果佢思想夠成熟，能夠俾到你安全感嘅話，有必要太拘謹於數字上嘅差距嗎？

9planets

他對將來有計劃嗎？

好多女生擔心，同細過自己嘅男生拍拖會「無將來」，驚佢只係「玩玩吓」。而且如果自己身邊朋友開始結婚，同一個年紀細啲，有好似未定性嘅男生一齊，怕會浪費青春。

但其實諗深一層，男生年紀大定細，都唔保證佢一定可以俾到幸福你。更重要嘅，應該係佢嘅性格如何？你哋之間夾唔夾？佢對你係咪認真？如果佢對將來有一定計劃，你亦睇得出佢肯努力向目標進發，就應該要對佢有信心。

9planets

大家有共同的目標嗎？

兩個人要一齊生活落去，有共同嘅目標係好重要。如果你一心想30歲後結婚做主婦，但佢只想環遊世界無諗過建立家庭，即使呢一刻大家拍拖好有火花，之後都會有好多問題出現。相反，如果大家憧憬嘅未來係一樣嘅話，呢段感情長遠嚟講亦會維繫得更好。

9planets

你害怕旁人目光嗎？


如果問完自己以上幾個問題之後，你覺得佢係合適嘅男友，但心裏依然有小小卻步嘅話，咁你就要問下自己，係咪因為驚旁人對「姊弟戀」嘅目光？如果係咁嘅話，可能問題係出喺你而唔係佢身上。


其實愛情係兩個人之間嘅事，人哋點睇點諗，並唔係最重要。但如果你好在乎身邊人點睇自己，覺得同細過自己嘅男友一齊唔自在，咁就真係要諗清楚應唔應該開展呢段感情，以免輕率開始咗之後你又後悔，浪費大家時間，甚至傷害到對方。